Kadagiti napalabas a lawas, naimaldit dagiti panaglabsing iti karbengan-tao laban kadagiti mannalon, mangngalap ken kabataan estudyante dagiti elemento ti Armed Forces of the Philippines ken ti lokal a gubyerno.

Demolisyon. Kinundenar ti Pamalakaya-Cavite ti iligal a panangrebba ti demolition team ti lokal a gubyerno ti Bacoor City kadagiti balbalay dagiti mangngalap idiay Barangay Talaba 2 idi Hunyo 15. Awan awit a dokumento dagiti tauhan, nu di ket “berbal a mandato” laeng. Basar iti dayalogo ti grupo ken Meyor Strike Revilla idi Mayo, agingga koma pay Hulyo nga agtalinaed dagiti mangngalap, ken maikkan dagiti apektado ti fisherman’s dorm wenno pagnaedan.

Idi Hunyo 1, inkapilitan a pinapanaw ken dinadael dagiti tauhan ti Pieceland Corporation ti 14 a nabati a balbalay dagiti katutubo a Mangyan-Iraya iti Sitio Malatabako, Barangay San Vicente, Abra de Ilog, Occidental Mindoro. Napasamak ti insidente kalpasan nga agdesisyon ti Abra de Ilog Municipal Trial Court idi Abril 8 a nagbasol ti siyam a katutubo a Mangyan-Iraya iti kaso nga “other forms of trespass” (panagbasak).

Panagdukot ken tortyur. Pwersado a dinukot dagiti nakasibilyan nga ahente ti 5th ID ni Angel Lopez, konsehal ti UP Diliman University Student Council ken boluntir ti Youth Advocates for Climate Action Philippines idi Hunyo 13 bayat nga agiyar-aramid ti kampanya iti impormasyon ken edukasyon iti Barangay Kakiduguen, Kasibu, Nueva Vizcaya. Iti kustodiya ti militar, inpasidong da isuna iti sikolohikal ken emosyonal a tortyur. Adda isuna iti lugar tapno tumulong iti kampanya para kadagiti komunidad a maapektaran ti operasyon ti North Luzon Mineral Resources Corporation. Nakakampo ti 86th IB iti barangay hall ti Kakiduguen tapno lapdan ti panaglaban dagiti residente iti panagminas iti komunidad da.

Militarisasyon. Manipud Hunyo 7 agingga iti agdama, nakaipasidong iti militarisasyon ti 62nd IB dagiti komunidad iti Central Negros. Idi Hunyo 8, iligal a hinalughog ti militar dagiti kabalbalayan kadagiti sityo ti Punong, Nabakalan, Anahaw, Tribu, Laos, ken Agpapataw a masarakan iti nagbebeddengan dagiti barangay ti Trinidad, Sandayao ken Binobohan idiay Guihulngan City, Negros Oriental. Kabayatanna, nagkampo met ti sumagmamano a soldado iti Agogolo Elementary School idiay Barangay Macagahay, Moises Padilla, Negros Occidental a nangipaay ti buteng ken perwisyo kadagiti manursuro ken estudyante. Palalo met nga apektado daytoy ti pagbiagan dagiti residente.