Linais ti rebolusyonaryo a tignay idiay Southern Tagalog ti deklarasyon nga Stable Internal Peace and Security (SIPS) ti rehimen Marcos ken Armed Forces of the Philippines (AFP) iti rehiyon a Calabarzon (Cavite, Laguna, Batangas, Rizal ken Quezon) idi Hunyo 12. Indeklara ti AFP a “natalna” ken awanen ti impluwensya ti rebolusyonaryo a tignay iti rehiyon.

Segun ken Ka Cleo del Mundo, tagapagsarita ti New People’s Army (NPA)-Southern Tagalog (Melito Glor Command), agar-arapaap a siririing ti rehimen US-Marcos iti daytoy a deklarasyon. “Bayat nga agpampammarang nga awanen ti rebolusyonaryo a pwersa idiay Calabarzon, todo ken awan sarday met dagiti operasyon militar iti nadumaduma a paset daytoy,” kunana. Agtultuloy kano ti panagsuksukisok dagiti pwersa ti Southern Luzon Command ti AFP ken 2nd ID kadagiti kabanbantayan ken kaaw-awayan.

Nayon ni del Mundo, ti “kapya” a gagem ti SIPS ket para kadagiti imperyalista, dadakkel a negosyo ken korporasyon. Ad-adda nga ik-ikkan isuda ti rehimen ti wayawaya a kamkamen ti natural a kinabaknang, padisyen dagiti mannalon, baraten ti sweldo dagiti mangmangged-talon ken paidaman ti serbisyo a panggimong ti umili.

Ti deklarasyon ken paset met kano ti panangisagut iti imperyalismo a US ti kinapudno ken garantiya a nawayan nga aramaten ti rehiyon iti gera nga agresyon ken dadduma pay a pang-ekonomya nga interes daytoy. Agbalin laeng a “nawaya” nga ipwesto dagiti imperyalista ti tropa da sadinno man a suli ti rehiyon gapu ta “awanen” dagiti “tubeng.”

Adda ti dagsen daytoy nangruna ta ti Calabarzon ti maysa kadagiti nakaisayangkatan ti Balikatan Exercises ken paset ti Luzon Economic Corridor nga agserserbi iti malutluto nga imperyalista a gera laban iti China. Agplaplano pay daytoy nga agitakder ti eropwerto idiay Sangley Point, Cavite nga addaan pangmilitar ken komersyal nga usar.

Isu a segun ken del Mundo, bayat nga umir-irteng ti panangidadanes ken panaggundaway ket agtultuloy ti panaglaban ti umili ken agtalinaed da a nakasanggir iti rebolusyonaryo a tignay, a makitkita da a kaykaysuna a kadwa da iti sango daytoy. “Iti kaanoman ket saan a napukaw ti hukbo ti umili iti Southern Tagalog. Nakasagana dagiti yunit ti NPA iti sidong ti Melito Glor Command nga agpinget iti armado a rebolusyon ken itunda daytoy agingga balligi,” kunana.

Kas pammaneknek iti agtultuloy a panagpursigi ti rebolusyonaryo a tignay iti Calabarzon, nagiruar ti pablaak dagiti yunit ti NPA manipud iti Batangas, Rizal ken Quezon, ken ti National Democratic Front idiay Cavite ken Laguna. Indeklara da ti pangngeddeng nga agpinget ken umabante nangruna iti anag ti tignay panagilinteg.