Protesta ti mannalon ti simmabat idi Hunyo 10 iti maika-38 tawen ti bangkarote a Comprehensive Agrarian Reform Program (CARP). Inawagan da daytoy a programa kas “kabayagan, kagastusan ken kadaraan nga ubbaw a reporma iti daga” nga inpatungpal ti reaksyunaryo nga estado.

Iti unos ti uppat a dekada, saan a dinuprak ti programa ti monopolyo a kontrol dagiti apo’t daga ken kapitalista iti nalalawa nga asyenda, plantasyon ken dadakkel a parsela ti daga. Ketdi, nagserbi daytoy nga instrumento dagiti gangannaet a kumpanya ken lokal nga apo’t daga tapno palawaen dagiti plantasyon para kadagiti mula a pang-eksport, proyekto a real estate ken “para iti panagdur-as,” ken iti daytoy maudi, dagiti proyekto para iti renewable energy kadagiti daga a pang-agrikultura.

Napakaro pay daytoy nga urnos iti inpatungpal ti rehimen Marcos ti Support to Parcelization of Lands for Individual Titling wenno SPLIT ti World Bank. Gagem daytoy a buraken ti kolektibo a panagtagikwa dagiti asosasyon ti mannalon kadagiti parsela ti daga tapno aramiden a nalaklaka ti panaglako kadagiti indibidwal a parsela kadagiti gangannaet a kumpanya. Naigiddan ditoy ti naawagan nga “Emancipation Act” para kano iti “panangbura” kadagiti utang dagiti mannalon, tapno awanen ti bayadan dagiti gumatang.

Bayat a maipapaidam ti daga kadagiti mannalon, gungundawayan dagiti gangannaet a kumpanya ken apo’t daga ti nalaka a pigsa’t tegged ti minilyon a mannalon a sumsumrek kadagiti saan a regular a trabaho tapno agbiag da. Masuswelduan da iti nababbaba pay iti nailyan a minimum, nga adayo la unay iti makabiag a sweldo.

Iyabante ti dangadang para iti reporma ti daga

Kasungani iti panangibilang ti CARP iti daga kas tagilako, ibilbilang daytoy ti rebolusyonaryo a tignay kas karbengan dagiti agsuksukay. Kangrunaan a demokratiko a linaon ti programa para iti demokratiko a rebolusyon ti umili ti panagtungpal iti kalikagum dagiti mannalon nga agtagikwa ti daga a masuksukay, ken panangbura iti nadumaduma a porma ti pananggundaway a pyudal ken malapyudal. Iti laeng panagbaliw ti urnos iti kaaw-awayan a mabaliwan ti malapyudal a sistema a panggimong iti Pilipinas.

Umannurot iti Rebolusyonaryo a Tarabay iti Reporma iti Daga (RTRD) ti Communist Party of the Philippines, prinsipal a rebbengen ti demokratiko a gubyerno ti umili a “gun-oden daytoy a tarigagay babaen ti panangipatungpal ti komprehensibo a reporma iti daga.” Adda iti kaunggan daytoy ti libre a panangiwaras ti daga kadagiti nakurapay ken nababbaba agingga iti makintengnga a mannalon. Kagiddan daytoy ti panangisakad ti programa para iti panagtitinnulong iti produksyon ken panagpapigsa ti bileg iti pulitika dagiti mannalon laban kadagiti agar-ari a dasig ken dagiti armado a gamat da iti kaaw-awayan.

Uray saan pay a nagun-od ti nailyan a balligi ti demokratiko a rebolusyon ti umili, ipatpatungpalen ti Partido ken dagiti rebolusyonaryo a pwersa ti RGRL, partikular ti minimum a programa daytoy ti panangibaba ti abang ti daga, panangpunas iti usura ken panangingato iti sweldo dagiti mangmangged-talon. Maipatpatungpal met dagiti programa tapno ingato ti pastrek dagiti mannalon ken maiyab-abante ti awag para iti kasayaatan a presyo dagiti produkto da. Iti balangkas ti RTRD maisaysayangkat dagiti anti-pyudal a dangadang tapno magun-od ti hustisya a panggimong para iti minilyon a mannalon ken patignayen isuda para iti demokratiko a rebolusyon ti umili. Iti mismo a kanito ti pannakarippuog ti reaksyunaryo nga estado ken panangitakder ti demokratiko a gubyerno ti umili, maipatungpal ti maksimum a programa ti libre a panangiwaras ti daga kadagiti mannalon nga agsuksukay.

Sentral a rebbengen ti panangitakder ken panangpapigsa kadagiti timpuyog ti mannalon iti sidong ti Pambansang Katipunan ng mga Magbubukid (PKM). Iti kasta, usto ti awag ti PKM tapno papigsaen ti dangadang nga anti-pyudal, palawaen dagiti timpuyog ti masa iti kaaw-awayan, buklen ti rinibo a grupong pang-organisa ken napinget nga iruswat dagiti kampanya ti masa nga anti-pyudal, anti-pasista ken anti-imperyalista. Awag met daytoy ti panangibinglay ti rinibo a Nalabbaga a mannakigubat iti New People’s Army (NPA).

“Kangatwan a porma ti panaglaban ti masa a mannalon ti mismo a panangiggem ti armas,” inlanad ti PKM iti pablaak daytoy idi Hunyo 10. Kuna daytoy, iti panagpigsa ti NPA kadagiti larangan, kadagiti daga nga addaan kadagiti imperyalista a proyekto, ken kadagiti kataltalonan a makamkamkam ken mapatpatalaw dagiti mannalon, addang-addang a marebbek ti bileg pangpulitika ken pang-ekonomya ti aso-aso nga estado ken ti imperyalismo a US.