Panangiyakar iti pagbaludan ken Jovito Palparan, kinundenar. Nagturong idiay Korte Suprema idi Hunyo 15 da Erlinda Cadapan ken Concepcion Empeño, dagiti ina ti dua nga aktibista a da Sherlyn Cadapan ken Karen Empeño, tapno ipaganetget nga ibunannag ti ayan ti heneral a ni Jovito Palparan. Ni Palparan ken nasentensyaan ti tungpal-biag a pannakaibalud nga awanan parole idi 2018 iti kaso a kidnapping ken serious illegal detention laban iti dua. Kinuwestyon dagiti ina, kabadang ti Karapatan, ti pannakapukaw ni Palparan manipud iti New Bilibid Prison kalpasan a naisubli dagiti legal notice nga addaan marka a “transferred to BuCor-Baguio” ken “PMA Baguio.” Segun met iti NBP adda kano laeng iti “ospital” isuna.

Mangngalap iti Navotas City, balbaliw a nagprotesta kontra reklamasyon. Balbaliw a nagprotesta idiay Navotas City dagiti mangngalap idi Hunyo 8 kas pananglagip iti World Oceans Day ken panangkundenar kadagiti proyekto a reklamasyon idiay Manila Bay. Kangrunaan a binatikos ti Pamalakaya-Navotas ti 650-ektarya a Navotas Coastal Bay Reclamation Project nga idurduron ti lokal a gubyerno ken ti Argonbay Construction, subsidyaryo ti San Miguel Corporation. Segun iti grupo, ipegpeggad ti proyekto ti pagbiagan, karbengan ken biag dagiti residente, karaman ti pangta ti panagpatalaw, panaglayus ken pannakadadael ti kalikasan.

Hustisya para kadagiti pimmusay nga estudyante a basketbolista ti ADMU, naiyawag. Nagisayangkat ti walkout dagiti estudyante ken manursuro ti Ateneo de Manila University (ADMU) idiay Quezon City idi Hunyo 19 tapno iyawag ti hustisya iti pannakatay ti dua a basketbolista a da Rene Baterbonia ken Divine Adili. Pimmusay ti dua kalpasan a malmes da idiay Dipaculao, Aurora idi Hunyo 8 iti tengnga ti treyning ken aktibidad ti tim iti basketbol. Immawag dagiti estudyante, manursuro ken propesor ti ADMU iti administrasyon ti unibersidad nga agbalin a napudno iti publiko, sungbatan ti napasamak, dumawat ti dispensar ken ikkan hustisya ti pamilya dagiti biktima. Sakbay daytoy, nagisayangkat ti programa ken nagitugkel ti kandila dagiti progresibo a grupo ken estudyante idi Hunyo 10.

Wayawaya ken Mary Jane Veloso, balbaliw a naiyawag. Nagprotesta iti sango ti Correctional Institute for Women iti Mandaluyong City ti nadumaduma a grupo, iti panangiyuna ti Migrante International, idi Hunyo 19 tapno iyawag ti madagdagus a pannakawayawaya ni Mary Jane Veloso. Ti tignay ket nairana iti panangited ni Veloso ti pablaak seknan iti inpila na a kaso a human trafficking, illegal recruitment ken estafa idi 2015 laban iti rekruter na. Daytoy ti umuna a daras a makaited isuna ti testimonya na.