Pagsaylo sang bilangguan kay Jovito Palparan, ginkundenar. Nagkadto sa Korte Suprema sadtong Hunyo 15 sanday Erlinda Cadapan kag Concepcion Empeño, mga iloy sang mga nadula nga aktibista nga sanday Sherlyn Cadapan kag Karen Empeño, agud igiit nga ibuyagyag ang nahamtangan sang anay heneral nga si Jovito Palparan. Si Palparan napamatbatan sang bug-os kabuhi nga pagkabilanggo nga wala sang parole sadtong 2018 sa kaso nga kidnapping kag serious illegal detention batuk sa duha. Ginkwestyon sang mga iloy, kabulig ang Karapatan, ang pagkadula ni Palparan gikan sa New Bilibid Prison pagkatapos ibalik ang mga legal notice nga may marka nga “transferred to BuCor-Baguio” kag “PMA Baguio.” Suno naman sa NBP, yara sa “ospital” lang kuno siya.

Mga mangingisda sang Navotas City, liwat nagprotesta kontra reklamasyon. Liwat nagprotesta sa Navotas City ang mga mangingisda sadtohg Hunyo 8 bilang pagdumdom sa World Oceans Day kag pagkundenar sa mga proyektong reklamasyon sa Manila Bay. Nagapanguna nga ginbatikos sang Pamalakaya-Navotas ang 650-ektarya nga Navotas Coastal Bay Reclamation Project nga ginaduso sang lokal nga gobyerno kag Argonbay Construction, subsidyaryo sang San Miguel Corporation. Suno sa grupo, ginabutang sa peligro sang proyekto ang palangabuhian, kinamatarung, kag kabuhi sang mga residente, kaupod ang peligro sang pagpalayas, pagbaha, kag pagkawasak sang kapalibutan.

Hustisya para sa napatay nga mga estudyante nga basketbolista sang ADMU, ginpanawagan. Naglunsar sang walk- out ang mga estudyante kag manunudlo sang Ateneo de Manila University (ADMU) sa Quezon City sadtong Hunyo 19 agud ipanawagan ang hustisya sa pagkapatay sang duha ka basketbolista nga sanday Rene Baterbonia kag Divine Adili. Napatay ang duha pagkatapos malumos sa Dipaculao, Aurora sadtong Hunyo 8 sa tunga sang treyning kag aktibidad sang tim sa basketbol. Nagapanawagan ang mga estudyante, manunudlo kag propesor sang ADMU sa administrasyon sang unibersidad nga mangin tampad sa publiko, sabton ang natabo, mangayo sang pasaylo kag hatagan hustisya ang pamilya sang mga biktima. Antes sini, naglunsar sang programa kag nagsindi sang kandila ang mga progresibong grupo kag estudyante sadtong Hunyo 10.

Paghilway kay Mary Jane Veloso, liwat ginpanawagan. Nagprotesta sa atubang sang Correctional Institute for Women sa Mandaluyong City ang lain-lain nga grupo, sa pagpanguna sang Migrante International, sadtong Hunyo 19 agud ipanawagan ang gilayon nga paghilway kay Mary Jane Veloso. Ang aksyon gintuon sa paghatag ni Veloso sang pahayag kaangot sa ginpasaka niya nga kaso nga human trafficking, illegal recruitment kag estafa sadtong 2015 batuk sa iya rekruter. Ini ang una nga bes nga makahatag siya sang iya testimonya.