Sunod-sunod nga taktikal nga opensiba ang ginlunsar sang mga yunit sang Bagong Hukbong Bayan (BHB) sa Negros Island sadtong Hunyo 12 kag 14. Isa ka aktibo nga depensa naman ang ginlunsar sa Northern Samar.

Sadtong Hunyo 14, gin-ambus sang BHB-Northern Negros (Roselyn Jean Pelle Command) ang tropa sang Regional Mobile Force Battalion-Negros Island Region nga nagapatigayon sang kontra-insurhensiya nga operasyon sa Sityo Alimpolosan, Barangay Lalong, Calatrava, Negros Occidental. Gin-untat sang mga Pulang hangaway ang pagpalupok sang matalupangdan nila nga may mga sibilyan nga kaupod ang mga pulis. Wala na ginpadayon sang Pulang hangaway ang paglusob para maseguro ang kaluwasan sang mga ini.

Ang gin-ambus nga yunit sang pulis yara sa erya agud ipadayon ang Retooled Community Support Program (RCSP) nga ginsugdan sang 79th IB. Ang RCSP isa ka pakitang-tao nga programa kag tabon para labi pa nga pasingkion ang militarisasyon sa kaumhan.

Sadtong Hunyo 12, nabulabog ang mga soldado sang 62nd IB sa detatsment sa Barangay Sikatuna, Isabela, Negros Occidental sa ginlunsar nga operasyon haras sang BHB-Central Negros (Leonardo Panaligan Command). Isa ka pasista nga soldado ang napatay kag isa ang napilasan sa armadong aksyon.

Sa Northern Samar, naglunsar sang armadong aksyon ang BHB-Northern Samar (Rodante Urtal Command) batuk sa 20th IB sa Barangay Catotoogan, Las Navas sadtong Hunyo 4 sang hapon. Nauna nga nagpalupok kag aktibo nga nakadepensa ang Pulang hukbo batuk sa naga-operasyon nga mga soldado. Anum ka tropa sang 20th IB ang napatay kag madamo ka iban pa ang napilasan. Sa ospital, duha pa ang napatay sang ulihi.