Nagtapok ang mga representante sa mga balangay ug yunit sa Christians for National Liberation (CNL) niadtong ikaduhang kwarto sa tuig aron ipahigayon ang ilang ika-10 nga kongreso. Mitambong dinhi ang mga obispo, relihiyoso ug pastor, mamumuong layko ug mga representante sa kabatan-onang gikan sa nagkadaiyang rehiyon sa nasud.

Gipahigayon ang kongreso sa temang “Palig-onon ug palapdon ang atong han-ay ug labaw pang iasdang ang nasudnon-demokratikong rebolusyon nga adunay sosyalistang perspektiba; Palalumon ang atong integrasyon sa masa sa pagpukan sa burukrata-kapitalista ug pasistang rehimeng US-Marcos.” Gitibuok niini ang bag-ong upat ka tuig nga plano ug nagpili og mga upisyal.

Sumala kang Renmin Malaya, ang napiling tigpangulo sa grupo, tukma sa panahon ang tigum sa konteksto sa kalihukang pagtul-id sa tibuok rebolusyonaryong kalihukan sa Pilipinas, ug taliwala sa niulbo nga inter-imperyalistang panagbangi ug gubat ug ang nagkadakong siak sa han-ay sa mga lokal nga nagharing hut-ong sa nasud.

“Segurado nga mahimong dako ang amot sa CNL sa kasamtangang paningkamot nga iasdang ang rebolusyong Pilipino. Anaa kini sa yugto karon sa bag-ong pagpalig-on, human miagi sa panahon sa pag-atras ug seryosong mga kadaot tungod sa internal nga mga kahuyangan ug sayop,” mensahe sa Komite Sentral sa Partido Komunista sa Pilipinas. Napaabot usab og pagtimbaya sa CNL ang mga alyadong organisasyon sa NDFP.

Sa pagtapos sa kongreso, gihatagan og pasidungog sa CNL ang mga martir ug bayani sa rebolusyong Pilipino. Partikular niining gipasidunggan si Ka Luis Jalandoni, usa sa mga nagtukod sa CNL, nga namatay niadtong Hunyo 7, 2025. “Inspirasyon nato sila. Wala nila gitihik ang ilang kinabuhi,” sumala kang Phillip Rebson, bag-ong napiling pagkinatibuk-ang kalihim sa CNL.