Nagtapok niadtong Hunyo 29 sa kampus sa Central Luzon State University sa Nueva Ecija ang mga mag-uuma, kabatan-onan ug estudyante, syentista, tigpanalipod sa kinaiyahan, ug mga representante sa simbahan, aron itukod ang Movement Against Destructive Solar Farms (MADSOLAR). Usa kini ka grupo nga nakigbatok sa makadaot nga mga solar farm sa Central Luzon.

Usa sa mga proyekto nga solar farm sa rehiyon mao ang MTerra Solar Project nga molangkob sa 3,500-7,000 ka ektarya nga yutang panguma sa mga lungsod sa Nueva Ecija ug Bulacan. Itukod kini sa Meralco PowerGen ug sa langyaw nga kompanya nga General Atlantic.

Kalabot sa maong proyekto, gihulga og pugos nga pagpahawa ang mga residente sa Sityo Sangilo, Barangay Macabaklay, Gapan City, Nueva Ecija niadtong Hulyo 2. Hinanaling misulong sa sityo ang nagpailang tag-iya sa yuta nga si Rey Tan kauban ang mga pulas ug pipila ka mga armadong tawo-tawo.