Nagtirok an mga tinaglawas han mga tsapter ngan yunit han Christians for National Liberation (CNL) hadton ikaduha nga kwarter han tuig agud ilansar an ira ika-10 nga kongreso. Tinambong dinhi an mga obispo, relihiyoso ngan pastor, trabahador nga layko ngan mga tinaglawas han kabatan-unan tikang ha magkalain-lain nga rehiyon ha nasud.

Iginlansar an kongreso ha tema nga “Pakusgon ngan pahiluagon an aton ranggo ngan pursigido nga ipasulong an nasyunal demokratiko nga rebolusyon nga mayda sosyalista nga perspektiba; Pahilarumon an aton integrasyon ha masa ha pagpapabagsak ha burukrata kapitalista ngan pasista nga rehimen US-Marcos.” Ginbug-os hini an bag-o nga upat katuig nga plano ngan nag-eleher han mga upisyal.

Sigon kan Renmin Malaya, an naeleher nga tagapangulo han grupo, napapanahon an katitirok ha konteksto han kagiusan pagtutul-id han bug-os nga rebolusyunaryo nga kagiusan han Pilipinas, ngan ha butnga han natikapintas nga inter-imperyalista nga sumpakiay ngan gerra ngan natikadako nga butak ha giutan han mga lokal nga naghahadi nga klase ha nasud.

“Piho nga magigin dako an amot han CNL ha presente nga panalinguha nga ipasulong an rebolusyon nga Pilipino. Aada ini yana ha balitang han panibag-o nga pagpapakusog, kahuman umagi ha panahon han pag-atras ngan seryoso nga mga kahibangan bunga han pansakob nga mga kaluyahan ngan pagsasayop,” mensahe han Komite Sentral han Partido Komunista ng Pilipinas. Nagpaabot liwat han pagbati ha CNL an mga alyado nga organisasyon han NDFP.

Ha paghuhuman han Kongreso, gintagan pasidungog han CNL an mga martir ngan bayani han rebolusyon Pilipino. Partikular hini nga ginpasidunggan hi Ka Luis Jalandoni, usa ha mga nagtukod ha CNL, nga namatay hadton Hunyo 7, 2025. “Inspirasyon naton hira. Diri hira nagin mahikaw ha kinabuhi,” pahayag ni Philip Rebson, bag-o nga naeleher nga pankabug-usan nga sekretaryo han CNL.