Gitay-og sa mga kusog nga linog ang amihanang-tungang bahin sa Venezuela, lakip ang kabiserang Caracas ug ang rehiyon sa La Guaira, niadtong hapon sa Hunyo 24. Sumala sa mga taho, nahitabo ang sunson nga linog nga adunay kusog nga magnitude 7.2 ug magnitude 7.5 sulod sa 39 ka segundo. Tungod sa kamabaw sa gigikanan sa linog sa San Sebastián fault system, nahugno ang daghang bilding ug ospital, ug naputol ang suplay sa kuryente ug komunikasyon sa milyon ka tawo.

Sa mga taho niadtong Hulyo 5, hapit 3,000 na ang kumpirmadong namatay, kapin 16,000 ang naangol ug liboan ang gipangita pa sa mga nahugnong bilding. Kapin 16,000 ang nawad-an og puy-anan ug 850 ka bilding ang nahugno diin 190 niini ang hingpit nga natumba.

Nagpaabot og pahasubo ug rebolusyonaryong pakighiusa ang Partido Komunista sa Pilipinas (PKP), National Democratic Front of the Philippines ug ang tibuok rebolusyonaryong kalihukan sa Pilipinas sa katawhan sa Venezuela.

Kadungan niini, gisaway sa PKP ang pagsakmit sa US sa katalagman aron magpwesto og mga tropa sa sulod sa Venezuela. Niadtong gabii sa Hunyo 25, nitugpa sa Caracas ang mga tropang Amerikano aron direktang manghilabot sa mga operasyon sa mga sibilyang ahensya sa nasud. Kadungan niini, gipadala sa US Southern Command ang mga barkong iggugubat nga USS Fort Lauderdale ug USS Billings sa kadagatan nga sakop sa Venezuela, uban ang dagkong transport aircraft nga C-17 Globemaster ug C-130 Hercules. Kining mga yunit ang misulong sa Caracas niadtong Enero 3, ug midakit sa presidente sa Venezuela nga si Nicolás Maduro ug asawa niyang si Cilia Flores.

Sumala sa PKP, tampalasan ang paggamit sa US sa kalamidad ug “makatawong mga rason” aron manghilabot sa Venezuela ilabi na sa atubangan pagpahamtang niini og mga bangis nga mga sangsyon nga niguba sa ekonomya ug pag-uswag sa nasud sa taas nga panahon. Kining mga sangsyon ug uban pang tikang sa US, gigamit aron pugson ang gubyerno sa Venezuela nga sundon ang mga dikta ni Trump.