Nagpadangat og pahasubo ang Special Office for the Protection of Children (SOPC) sa National Democratic Front of the Philippines (NDFP), ngadto sa mga pamilya, kabanay, klasmeyt, magtutudlo, ug mga komunidad nga naapektuhan sa trahedya sa pagpamusil sa eskwelahan sa Tacloban City niadtong Hunyo 22. Sumala niini, dili lang kini trahedya sa mga indibidwal kundi usa ka sintomas sa usa ka nadunot nga sistema.

Giyagyag sa pagpamusil sa eskwelahan sa Tacloban ang bangis ug magun-obong kinaiya sa katilingbang Pilipino nga naghulma sa kinabuhi sa mga batang Pilipino, sumala sa SOPC. Ubos sa kasamtangang sistema, nahimo nang normal ang kultura sa kabangis ug kawalay-pagpanubag. Matag adlaw, saksi ang mga bata sa grabeng kalisod, pasismo sa estado, korapsyon, ug kawalay matuod nga higayon para sa ilang kaugmaon. Sa ingon niining kahimtang, nahimong kabahin sa kahimatngon sa bata ang kapintas.

Gisupak sa SOPC ang mga pagsulay sa reaksyunaryong gubyerno nga gamiton ang trahedya aron iduso ang mga kontra-batang palisiya. Matud niini, sayop nga gamitong rason ang trahedya para ipakunhod ang minimum age of criminal responsibility. Ang mga ingon niining sugyot dili tubag sa gamut sa kapintasan ug pugos lang nga gipasa ang pagbasol sa mga bata mismo. Ang matuod nga isyu mao ang pagbungkag sa kultura sa kawalay-pagpanubag nga gipatunhay sa nagharing hut-ong, ug dili ang mas bug-at nga pagsilot sa mga bata.

Gipahayag sa NDFP nga sa mga rebolusyonaryong erya, aktibong gipatuman sa mga organo sa gahum sa politika (gubyerno sa katawhan) ang mga programa para sa kaayohan sa bata. Kabahin niini ang mga kampanya sa literasiya ug edukasyong nakabase sa kahimtang sa ilang mga komunidad. Tumong niini nga hulmahon ang mga bata isip mga responsableng myembro sa katilingban nga adunay taas nga kaamgohang pangkatilingban.

Pundamental sa panan-aw sa NDFP ang pag-ila nga nagauswag ang mga bata kung adunay gahum ang ilang mga pamilya ug komunidad, matud niini. Ang kawalay yuta, kawalay trabaho, ubos nga suholan, pinugos nga migrasyon, ug kawalay mga serbisyong katilingbanon maoy miguba sa kaayohan sa mga bata. Sa ingon, ang matuod nga proteksyon sa bata dili mabulag sa pakigbisog para sa reporma sa yuta, nasudnong industriyalisasyon, soberanya sa ekonomya, ug mga demokratikong katungod.