Nagmartsa ang mga progresibong grupo padulong sa embahada sa US sa Manila niadtong Hulyo 4 aron handumon pinaagi sa protesta sa ika-80 kuno nga “friendship day” tali sa US ug Pilipinas. Tatak sa neokolonyalismo ang pagsaulog niini sa nasud.

Gikundena sa mga raliyista ang padayong pagpanghilabot sa US sa Pilipinas ug ang pagguyod niini sa mga Pilipino sa gihulhog nga imperyalistang gubat sa China. Nanawagan sila sa pagsalikway sa mga Pilipino sa kasabutan sa militar, pagsira sa mga base militar sa US, ug pagpalayas sa mga tropa niini sa sulod ug palibot sa nasud.

“War rehearsal” sa Asia

Dili moubos sa 40,000 ka tropa nga militar gikan sa kapin 30 ka nasud ang dungan nga gipalihok sa US sa mga war games sa lain-laing bahin sa Asia niadtong Hunyo sa usa ka lapad nga “war rehearsal” o kun pagbansay sa gubat. Gilunsad niini ang Resolute Dragon sa Japan, kauban ang militaristang rehimen ni Sanae Takaichi, Valiant Shield sa Guam, ug ang dakong RIMPAC sa Hawaii nga gisalmotan sa 25,000-31,00 ka tropa. Sa Pilipinas, gidungan niini ang Kamandag exercises niadtong Hunyo 15-Hulyo 1 sa Northern ug Central Luzon, Palawan, Cavite, Tawi-tawi, ug Metro Manila.

Gikonsentrar ang dungan ug koordinado nga mga pagbansay sa gubat sa First ug Second Island Chain isip “rehearsal” o pagbansay sa nagkalain-laing hukbo alang sa gipangandaman niining imperyalistang gubat batok sa China. Hugot nga gikundena sa Partido Komunista sa Pilipinas ang pahoy nga rehimeng Marcos sa dayag nga pagpangiyugpos niini sa US ug pagpaguyod niini ngadto sa heyopulitikal nga kagubot sa duha ka imperyalistang nasud.