Nagtipon ang mga tiglawas sang mga tsapter kag yunit sang Christians for National Liberation (CNL) sadtong ikaduha nga kwarto sang tuig agud hiwaton ang ila ika-10 nga kongreso. Nagtambong diri ang mga obispo, relihiyoso kag pastor, mamumugon nga layko kag mga tiglawas sang pamatan-on halin sa lain-lain nga rehiyon sang pungsod.

Ginlunsar ang kongreso sa tema nga “Pabaskugon kag palaparon ang aton kubay kag labi nga isulong ang pungsodnon-demokratikong rebolusyon nga may sosyalistang perspektiba; Padalumon ang aton integrasyon sa masa sa pagpukan sa burukrata-kapitalista kag pasistang rehimen Marcos.” Ginhimo sini ang bag-o nga apat ka tuig nga plano kag nagpili sang mga opisyal.

Suno kay Renmin Malaya, ang napilian nga tsirman sang grupo, napanahon ang pagtipon sa konteksto sang kahublagan panadlong sang bug-os nga rebolusyonaryong kahublagan sang Pilipinas, kag sa tunga sang nagasingki nga inter-imperyalistang gitgitanay kag gyera kag ang nagakado nga biak sa tunga sang mga lokal nga mga nagahari nga sahi sa pungsod.

“Segurado nga mangin dako ang amot sang CNL sa subong nga pagtinguha nga isulong ang rebolusyon Pilipino. Yara sa halintang ini subong sang panibag-o nga pagpabaskog, pagkatapos nag-agi sa panahon sang pag-atras kag seryoso nga mga kahalitan bunga sang pangsulod nga mga kahuyangan kag kasaypanan.” mensahe sang Komite Sentral sang Partido. Nagpaabot man sang pagtamyaw sa CNL ang mga alyadong organisasyon sang NDFP.

Sa pagtapos sang kongreso, ginhatagan sang pasidungog sang CNL ang mga martir kag baganihan sang rebolusyon Pilipino. Partikular sini nga ginpasidunggan si Ka Luis Jalandoni, isa sa mga nagtukod sang CNL, nga napatay sadtong Hunyo 7, 2025. “Inspirasyon naton sila. Indi sila nangin dalok sang ila kabuhi,” pahayag ni Phillip Rebson, bag-o nga napilian nga heneral nga sekretaryo sang CNL.