CLSU, nag-walkout kontra pagpangsumpo. Masobra 200 ka estudyante sang Central Luzon State University sa Nueva Ecija ang nag-walkout sa klase sadtong Hunyo 22 para kundenaron ang pagsumpo sang ila demokratikong kinamatarung, Red-tagging kag pagpang-ipit sang estado sa mga lider-estudyante sang unibersidad. Nagpanindugan sila batuk sa pagtilaw nga pagpahipos sang administrasyon kag sang mga pwersa sang estado.

Justice for Negros 19 Network, gintukod. Nagtipon ang mga himata, abyan kag mga tagpangapin sang tawhanon nga kinamatarung sa UP Diliman sa Quezon City sadtong Hunyo 24 agud tukuron ang Justice for Negros 19 Network. Padayunon sini ang kampanya para sa kamatuoran, salabton kag hustisya para sa Negros 19 nga ginmasaker sang AFP sadtong Abril 19 sa Barangay Salamanca, Toboso, Negros Occidental.

Pride Protest, ginlunsar sang mga grupong LGBTQ+. Nagtipon ang lain-lain nga grupo kag alyado sang mga LGBTQ+ sa Liwasang Bonifacio sa Manila sadtong Hunyo 26 agud dumdumon ang tuigan nga Stonewall Philippines Gay Pride. Gintum-ukan sang mga raliyista ang militanteng tradisyon sang Pride kag ginkundenar ang nagalala nga kahimtangan sang pumuluyo sa tunga sang krisis sa ekonomiya kag padayon nga imperyalistang interbensyon sang US sa Pilipinas. Naglunsar man sang militante nga Pride sa Baguio City, Laguna, Batangas kag Tacloban City.

Marcos, ginsug-alaw sang rali sa Canada. Ginatos ka myembro sang mga progresibo nga grupo ang wala-tuo nga nagprotesta agud batikuson si Ferdinand Marcos Jr sa pagbisita sa Canada sadtong Hulyo 1-4. Nagkadto sa Canada si Marcos para makigsapol kanday Prime Minister Mark Carney kag mga negosyante sa pungsod. Nakasugtan diri ang pagpalapad sa kooperasyon militar, pangapital sa pagmina sang mga bulawan kag kritikal nga mineral kag pagbaligya sang barato nga kusog pangabudlay sang mga Pilipino.