Sadtong Hunyo 15, ginreport sang Forbes magazine ang manggad ni Enrique Razon Jr nga yara sa $18.8 bilyon, ika-143 nga pinakadako sa bug-os nga kalibutan, kag bilang pinakamanggaranon nga Pilipino. Katumbas sang iya manggad ang ₱1.27 trilyon, rason para tawgon siya nga una nga “trilyunaryo” sa Pilipinas.

Pinakadako nga negosyo ni Razon ang International Container Terminal Services, Inc (nga may kabilugan nga kita nga ₱177.3 bilyon) Manila Water Co. (₱66.6 bilyon) kag Bloomberry Resorts Corp (₱53.9 bilyon). May mga negosyo man siya sa sektor sang pagmina, renewable energy, kuryente, real estate, lana kag pangapital. Ginapanag-iyahan man niya ang yara sa 60% sang apat ka gas-fired nga planta sang kuryente nga sadto ginauyatan sang mga Lopez.

Sadtong Marso, ginbakal niya ang SierraCol Energy Limited, ang pinakadako nga independyente nga kumpaniya sang lana kag gas sa Colombia, gikan sa The Carlyle Group.

Kronyismo ni Razon

Kilala nga kroni ang pamilya Razon sa panahon ni Marcos Sr, nga nagserbe nga kasangkapan sa pagkamal sang diktador sang minilyon ka dolyar nga balor sang pagkabutang. Ginpadayon ni Razon ang pagka-kroni sa kada administrasyon nga magpungko, ilabi na halin dekada 2000.

Pinakadasig ang paglapad sang ICTSI sa idalum sang anay presidente Gloria Arroyo, ang bana nga si Mike malapit ang relasyon kay Razon. Nangin importante siya nga tinawo sang mga Arroyo sa mga kontrobersyal nga mga kontrata, lakip ang pagbakal sang State Grid Corporation of China sa National Grid Corporation of the Philippines, kag sa napaslawan nga NBN-ZTE deal. Kabaylo sini, ginpondohan niya ang kandidatura ni Arroyo kag sang iya mga kaalyado. Sadtong 2007, nagserbe siya nga tresurero sang Team Unity sang Lakas-Kampi kag sang ulihi nangin kabahin sa pagtukod sang National Unity Party.

Sa idalum sang rehimen Duterte, sunod-sunod nga ginsakam ni Razon ang Manila Water kag mga kumpaniya sa kuryente, ang Apex Mining, mga casino ni Dennis Uy, kag iban pa. Halos nagdoble ang iya manggad sadtong pandemya.

Sa idalum sang rehimen US-Marcos, naglab-ot sa ₱909.3 bilyon ang ginsanyog sang iya kita, pinakadako sa mga dalagko nga burgesya kumprador.

Mga kontra-pumuluyo nga proyekto

Grabe si Razon sa ginakangil-aran nga mga negosyo, kontra-pumuluyo nga mga proyekto kag paggamit sang militar kag bayaran nga mga goons agud tapnaon ang pakigbato sang pumuluyo.

Lakip sa mga ini ang mga dam nga tukuron sa mga kadutaan nga ginpanubli sa katigulangan kag magapalayas sa mga tumandok kag mangunguma. Upod diri ang Wawa-Violago Dam sa Rizal, Jalaur Megadam Project sa Iloilo, Chico Hydropower Project sa Kalinga, kag Ahunan Dam sa Laguna.

Sadtong Pebrero 6, 2024, mga 101 ka tawo, kadam-an mga minero, ang napatay sa landslide sa Barangay Masara, Maco, Davao de Oro, yara sa sulod sang operasyon sang Apex Mining. Daan na nga may mga dalagko nga landslide sa lugar sadtong 2008 kag 2012 tuga sang lapnagon nga pagmina sa lugar.

Sadtong Enero 8, 36 ang napatay sa natiphag nga tambakan sang basura nga ginapadalagan sang Prime Integrated Waste Solutions Inc., kumpaniya ni Razon. Madugay na nga ginareklamo sang mga residente sang Barangay Binaliw, Cebu City ang tambakan tungod sa grabe nga baho kag epekto sini sa bukid kag mga suba sa palibot sini.

Sa Manila, masobra 7,000 ka residente ang nagahana nga madulaan sang puluy-an sa Parola Compound, Delpan, Binondo tungod sa North–South Harbor Bridge Project. Pagka-anunsyo sang pagsugod sang proyekto sadtong Mayo 22, pagka-aga, nasunog ang bug-os nga komunidad.

Manggad nga ginhuthot sa pumuluyo

Ang padayon nga pagmanggad sang mga dalagko nga burgesya kumprador, agalon mayduta kag burukrata kapitalista wala sang amot sa pagsulong sang pungsodnon nga industriyalisasyon kag pagtukod sang nagamakinaugalingon nga ekonomiya sang pungsod. Imbes, isa ini ka mabug-at nga palas-anon sang bug-os nga pumuluyo, tungod katumbas sini ang nagaluntad nga sistema sang pagpang-angaw sang duta para sa interes sang negosyo kag imperyalismong US.

Sa pihak sang nagalala nga inhustisya kag indi pag-alalangay, labi nga nagatingkad ang kahustuhon sang pagsulong sang pungsodnon-demokratikong rebolusyon agud ibagsak ang imperyalismo, pyudalismo kag burukrata kapitalismo. Sa idalum sang demokratikong gobyerno sang banwa, pagawasakon ang monopolyo sa duta, isulong ang pungsodnon nga industriyalisasyon, itib-ong ang hilway nga patakaran pangluwas kag segurohon ang kaayuhan sang masa sang pumuluyo.