Nagapaabot sang pakig-unong sa kalisod ang Special Office for the Protection of Children (SOPC) sang National Democratic Front of the Philippines (NDFP), sa mga pamilya, himata, kaklase, manunudlo, kag mga komunidad nga naapektuhan sang trahedya sang pagpaniro sa bulothoan sa Tacloban City sadtong Hunyo 22. Suno diri, indi lang ini trahedya sang mga indibidwal kundi isa ka sintomas sang isa ka nagakadunot nga sistema.

Ginabuyagyag sang pagpaniro sa bulothoan sa Tacloban ang mapintas kag makahalalit nga kinaiya sang sosyedad Pilipino nga nagahorma sa kabuhi sang mga bata nga Pilipino, suno sa SOPC. Sa idalum sang subong nga sistema, nangin normal ang kultura sang kalakasan kag kawad-on sang salabton. Kada adlaw, saksi ang mga bata sa grabe nga kaimolon, pasismo sang estado, korapsyon, kag kawad-on sang matuod nga oportunidad para sa ila buasdamlag. Sa amo sini nga kahimtangan, nangin kabahin sang kamuklatan sang mga bata ang kalakasan.

Ginapamatukan sang SOPC ang mga pagtinguha sang reaksyonaryong gobyerno nga gamiton ang trahedya agud isulong ang mga kontra-bata nga mga patakaran. Suno diri, sayup nga gamiton nga rason ang trahedya nga ini agud panubuon ang minimum age of criminal responsibility. Ang mga amo sini nga hagna wala nagasabat sa ugat sang kalakasan kag pilit lang nga ginabalhin ang basol sa mismo nga bata. Ang matuod nga isyu amo ang pagpasanyog sang kultura sang kawad-on sang salabton nga ginapabilin sang nagahari nga sahi, kag indi ang mas mabug-at nga pagsilot sa mga bata.

Ginpaambit sang NDFP nga sa mga rebolusyonaryong erya, aktibo nga nagapatuman ang mga organo sang gahum pangpulitika (gobyerno sang pumuluyo) sang mga programa para sa kaayuhan sang bata. Lakip diri ang mga kampanya nga literasiya kag edukasyon nga nagabase sa kahimtangan sang ila mga komunidad. Katuyuan sang mga ini nga hormahon ang mga bata bilang mga responsable nga katapo sang sosyedad nga may mataas nga kamuklatan sosyal. Pundamental sa panan-aw sang NDFP ang pagkilala nga naga-uswag ang mga bata kon may gahum ang ila mga pamilya kag komunidad, suno diri. Ang kawad-on sang duta, kawad-on sang trabaho, manubo nga sweldo, pwersahan nga migrasyon, kag kawad-on sang serbisyo sosyal nagaguba sa kaayuhan sang mga bata. Sa amo sini, ang matuod nga proteksyon sa bata amo ang indi maseparar sa paghimakas para sa reporma sa duta, pungsodnon nga industriyalisasyon, sobereniya sa ekonomiya, kag mga demokratikong kinamatarung.