Nagmartsa ang mga progresibo nga grupo padulong sa embahada sang US sa Manila sadtong Hulyo 4 para dumdumon sa protesta ang ika-80 nga kuno “friendship day” sa tunga sang US kag Pilipinas. Tatak sang neokolonyalismo ang pagsaulog sini sa pungsod.

Ginpakamalaut sang mga raliyista ang nagapadayon nga pagpasilabot sang US sa Pilipinas kag pagganoy sini sa mga Pilipino sa ginasulsolan nga gyerang imperyalista sa China. Nagapanawagan sila sa pagsikway sa mga indi patas nga kasugtanan militar, pagsira sang mga base militar sang US, kag pagpalayas sa mga tropa sini sa sulod kag palibot sang pungsod.

“War rehearsal” sa Asia

Indi magnubo sa 40,000 ka tropang militar halin sa masobra 30 ka pungsod ang dulungan nga ginpahulag sang US sa mga war games sa lain-lain nga bahin sang Asia sadtong Hunyo sa isa ka malaparan nga “war rehearsal” ukon pag-ensayo sa gyera. Ginpatigayon sini ang Resolute Dragon sa Japan kabulig ang militaristang rehimen ni Sanae Takaichi, Valiant Shield sa Guam, kag ang higante nga RIMPAC sa Hawaii nga ginpakigbahinan sang 25,000-31,000 tropa. Sa Pilipinas, gindungan sini ang Kamandag exercises sadtong Hunyo 15-Hulyo 1 sa Northern kag Central Luzon, Palawan, Cavite, Tawi-tawi kag Metro Manila.

Nakakonsentrar ang dulungan kag koordinado nga mga war games sa linya sang First kag Second Island Chain bilang “rehearsal” ukon pag-ensayo sang lain-lain nga hukbo para sa ginahanda sini nga imperyalistang gyera batuk sa China. Hugot nga ginkundenar sang Partido Komunista sang Pilipinas ang papet nga rehimen Marcos sa hayagan sini nga pagyaob sa US kag pagdalahig sini sa heyopulitikal nga banggaan sang duha ka imperyalistang pungsod.