Gin-uyog sang mga mabaskog nga linog ang norte-tunga-tunga nga bahin sang Venezuela lakip ang kabisera sang Caracas kag ang rehiyon sang La Guaira, sadtong hapon sang Hunyo 24. Suno sa mga report, natabo ang sunod-sunod nga linog nga may kabaskugon nga magnitude 7.2 kag magnitude 7.5 sa sulod sang 39 segundo. Tungod sa pagkanabaw sang ginhalinan sang linog sa San Sebastián fault system, narumpag ang madamo nga bilding kag ospital, kag nawad-an sang suplay sang kuryente kag komunikasyon ang minilyon ka tawo.

Sa mga report sadtong Hulyo 5, halos 3,000 na ang kumpirmado nga napatay, masobra 16,000 ang napilasan kag puluan ka libo ang ginapangita pa sa mga narumpag nga bilding. Masobra 16,000 ang nawad-an sang puluy-an kag 850 ka bilding ang narumpag kon diin 190 diri bilog nga narumpag.

Nagpaabot sang pakig-unong sa kasubo kag rebolusyonaryong pagpakig-isa ang Partido, NDFP kag ang bug-os nga kahublagan rebolusyonaryo nga Pilipino sa pumuluyo sang Venezuela.

Kadungan sini, ginbatikos sang PKP ang paghingalit sang US sa trahedya para magpwesto sang mga tropa sa sulod sang Venezuela. Sadtong gab-i sang Hunyo 25, naghugpa sa Caracas ang mga tropang Amerikano para direkta nga magpasilabot sa mga operasyon sang mga sibilyan nga ahensya sa pungsod. Kadungan sini, ginpadala sang US Southern Command ang mga barkong pang-gyera nga USS Fort Lauderdale kag USS Billings sa kadagatan nga sakop sang Venezuela, kaupod ang mga higante nga transport aircraft nga C-17 Globemaster kag C-130 Hercules. Ang mga yunit man nga ini ang nagsalakay sa Caracas sadtong Enero 3, kag nag-abdak sa presidente sang Venezuela nga si Nicolás Maduro kag asawa niya nga si Cilia Flores.

Suno sa PKP, makangilil-ad ang paggamit sang US sa kalamidad kag “makatawo nga mga rason” para magpasilabot sa Venezuela ilabi na sa atubang sang malawig nga panahon nga pagpatuman sini sang mga mapintas nga sangsyon nga naghalit sa ekonomiya kag pag-uswag sang pungsod. Ang mga sangsyon nga ini, kag iban pa pangpwersa nga tikang sang US, ginagamit para pwersahon ang gobyerno sang Venezuela nga sundon ang mga dikta ni Trump.