Nagmartsa an mga progresibo nga grupo ngadto ha embahada han US ha Manila hadton Hulyo 4 agud handumon ha protesta an ika-80 nga kunuhay “friendship day” ha giutan han US ngan Pilipinas. Tatak han neolokolonyalismo an pagselebrar hini ha nasud.

Ginkundenar han mga raliyista an nagpapadayon nga panginginlabot han US ha Pilipinas ngan pagdadanas hini ha mga Pilipino ha ginsusulsulan nga gerra han imperyalista ha China. Nanawagan hira ha pagsasalikway ha mga diri pantay nga panmilitar nga kasarabutan, pagseserra han mga base militar han US, ngan pagpapalayas ha mga tropa hini ha sakob ngan palibot han nasud.

“War rehearsal” ha Asia

Diri mamenos ha 40,000 nga tropa nga militar tikang ha masobra 30 nga nasud an dudrungan nga ginpagios han US ha mga war games ha magkalain-lain nga parte han Asia hadton Hunyo ha usa nga hiluagan nga “war rehearsal” o pagpapahiara ha gerra. Ginhimo hini an Resolute Dragon ha Japan kabakyang an militarista nga rehimen ni Sanae Takaichi, Valiant Shield ha Guam, ngan an higante nga RIMPAC ha Hawaii nga gintatambungan han 25,000-31,000 nga tropa. Ha Pilipinas, igindungan hini an Kamandag exercises hadton Hunyo 15-Hulyo 1 ha Northern ngan Central Luzon, Palawan, Cavite, Tawi-tawi ngan Metro Manila.

Nakakonsentra an durungan ngan koordinado nga mga war games ha kahilab-an han First ngan Second Island Chain komo “rehearsal” o pagpapahiara han magkalain-lain nga hukbo para ha gin-aandam hini nga imperyalista nga gerra kontra ha China. Mahugot nga ginkundena han Partido Komunista ng Pilipinas an niyutiyo nga rehimen Marcos nga butaray hini nga panginyupo ha US ngan pagdadanas hini ha heyopulitikal nga banggaay han duha nga imperyalista nga nasud.