Nagtirok hadton Hunyo 29 ha kampus han Central Luzon State University ha Nueva Ecija an mga parag-uma, kabatan-unan ngan estudyante, siyentista, tagdepensa han kalibungan, ngan mga tinaglawas han singbahan, agud tukuron an Movement Against Destructive Solar Farms (MADSOLAR). Usa ini nga grupo nga maato ha mapanwakay nga mga solar farm ha Central Luzon.

Usa ha mga proyekto nga solar farm ha rehiyon an MTerra Solar Project nga malupgop ha 3,500-7,000 kaektarya han pan-agrikultura nga tuna ha mga bungto han Nueva Ecija ngan Bulacan. Gintitindog ini han Meralco PowerGen ngan han langyaw nga kompaniya nga General Atlantic.

Kasumpay han proyekto, gintarhug han pwersahay nga pagpapalayas an mga residente han Sityo Sangilo, Barangay Macabaklay, Gapan City, Nueva Ecija hadton Hulyo 2. Kinadto ha sityo an nagpakilala nga tag-iya han tuna nga hi Rey Tan kaupod an mga pulis ngan pira nga mga armado nga tawuhan.