CLSU, nag-walkout kontra panmuypoy. Masobra 200 nga estudyante han Central Luzon State University ha Nueva Ecija an nag-walkout ha klase hadton Hunyo 22 para kundenahon an pagpuypoy ha ira demokratiko nga katungod, Red-tagging ngan pan-gigipit han estado ha mga lider-estudyante han unibersidad. Nanindugan hira kontra ha larang han administrasyon ngan han mga pwersa han estado nga pagpapamingaw.

Justice for Negros 19 Network, ginbug-os. Nagtirok an mga kaurupdan, kasangkayan, ngan mga tagdepensa han tawhanon nga katungod ha UP Diliman ha Quezon City hadton Hunyo 24 agud tukuron an Justice for Negros 19 Network. Igpapadayon hini an kampanya para ha kamatuoran, baratunon ngan hustisya para ha Negros 19 nga ginmasaker han AFP hadton Abril 19 ha Barangay Salamanca, Toboso, Negros Occidental.

Pride Protest, iginlansar han mga grupo han LGBTQ+. Nagtirok an magkalain-lain nga grupo ngan alyado han mga LGBTQ+ ha Liwasang Bonifacio ha Manila hadton Hunyo 26 agud handumon an tinuig nga Stonewall Philippines Gay Pride. Iginduon han mga raliyista an mga militante nga tradisyon han Pride ngan ginkundena an natikagrabe nga kamutangan han katawhan ha butnga han krisis ha ekonomiya ngan padayon nga imperyalista nga interbensyon han US ha Pilipinas. Naglansar liwat han militante nga protesta nga Pride ha Baguio City, Laguna, Batangas ngan Tacloban City.

Marcos, gintapo han rali ha Canada. Gatus-gatos nga membro han mga progresibo nga grupo an wala-tuo nga nagprotesta agud suknaon hi Ferdinand Marcos Jr ha pagbisita ha Canada hadton Hulyo 1-4. Kinadto ha Canada hi Marcos agud makigmiting kanda Prime Minister Mark Carney ngan mga negosyante ha nasud. Ginkasarabutan dinhi an pagpapahiluag ha panmilitar nga kooperasyon, pamumuhunan ha pagmimina han mga bulawan ngan kritikal nga mineral ngan pagbabaligya ha barato nga kusog-pagtrabaho han mga Pilipino.