Hadton Hunyo 15, iginreport han Forbes Magazine an karikuhan ni Enrique Razon Jr nga aada ha $18.8 kabilyon, ika-143 nga pinakadako ha bug-os nga kalibutan, ngan komo pinakariko nga Pilipino. An iya karikuhan katugbang hin ₱1.27 katrilyon, hinungdan para tawagon hiya nga syahan nga “trilyunaryo” ha Pilipinas.

Pinakadako nga negosyo ni Razon an International Container Terminal Services, Inc (nga mayda kabug-usan nga kita han ₱177.3 kabilyon), Manila Water Co. (P66.6 kabilyon) ngan Bloomberry Resorts Corp (₱53.9 kabilyon). Mayda liwat hiya mga negosyo ha sektor han pagmimina, renewable energy, kuryente, real estate, lana ngan pamumuhunan. Pananag-iya liwat niya an aada ha 60% han upat nga gas-fired nga planta han kuryente ha hadto katin han mga Lopez.

Hadton Marso, ginpalit niya an SierraCol Energy Limited, an pinakadako nga independyente nga kompaniya han lana ngan gas ha Colombia, tikang ha The Carlyle Group.

Kronyismo ni Razon

Kilalado nga kroni an pamilya Razon hadton panahon ni Marcos Sr, nga nagserbe nga instrumento ha paghakin han diktador han milyun-milyon nga dolyar nga balor han propyedad. Gginpadayon ni Razon an pagigin kroni ha kada administrasyon nga liningkod, labina tikang dekada 2000.

Pinakadagmit an paghiluag han ICTSI ha ilarum ni hadto anay presidente Gloria Arroyo, nga an asawa nga hi Mike Arroyo suok nga kasumpayan ni Razon. Nagin importante hiya nga tawuhan han mga Arroyo ha mga kontrobersyal nga mga kontrata, kalakip an pagpalit han State Grid Corporation of China ha National Grid Corporation of the Philippines, ngan ha napakyas nga NBN-ZTE deal. Kabalyo hini, ginpondohan niya an kandidatura ni Arroyo ngan han iya mga kaalyado. Hadton 2007, nagserbe hiya nga treasurer han Team Unity ha Lakas-Kampi ngan ha dayuday nagin kaparte ha pagtutukod han National Unity Party.

Ha ilarum han rehimen Duterte, susrunod nga ginkontrol ni Razon an Manila Water ngan mga kompaniya ha kuryente, an Apex Mining, mga casino ni Dennis Uy, ngan iba pa. Haros dinoble an iya karikuhan hadton pandemya.

Ha ilarum han rehimen US-Marcos, inabot ha ₱909.3 kabilyon an igintubo han iya kita, pinakadako ha dagko nga kumprador burgesya.

Mga kontra-katawhan nga proyekto

Lanong hi Razon ha makangaralas nga mga negosyo, kontra-katawhan nga mga proyekto ngan paggamit han militar ngan binaydan nga goons agud pugngan an pag-ato han katawhan.

Kalakip hini an mga dam nga gintitindog ha mga ansestral nga katunaan ngan magpapalayas ha mga minoriya ngan parag-uma. Kalakip dinhi an Wawa-Violago Dam ha Rizal, Jalaur Megadam Project ha Iloilo, Chico Hydropower Project ha Kalinga, ngan Ahunan Dama ha Laguna.

Hadton Pebrero 6, 2024, aada ha 101 katawo, kadam-an mga minero, an namatay ha landslide ha Barangay Masara, Maco, Davao de Oro, ha sakob han operasyon han Apex Mining. Una na liwat nga nagkamayda hin dagko nga landslide ha lugar hadton 2008 ngan 2012 durot han hiluagan nga pagmimina ha lugar.

Hadton Enero 8, 36 an namatay ha natimpag nga tambakan han basura nga gindudumara han Prime Integrated Waste Solutions Inc., kompaniya nga pananag-iya ni Razon. Maiha na nga iginrereklamo han mga residente han Barangay Binaliw, Cebu City an tambakan tungod ha grabe nga hurak ngan epekto hini ha bukid ngan mga salog ha palibot hini.

Ha Manila, masobra 7,000 nga residente an namamangpangan nga mawarayan han urukyan ha Parola Compound, Delpan, Binondo tungod ha North-South Harbor Bridge Project. Pagka-anunsyo han pagtitikang han proyekto hadton Mayo 22, kinabuwasan, nasunog an bug-os nga komunidad.

Karikuhan nga ginhuhuthot ha katawhan

An padayon nga pagriko han dagko nga kumprador burgesya, agaron maytuna ngan burukrata kapitalista waray amot ha pagpapasulong han nasyunal nga industriyalisasyon ngan pagtutukod han naglulugaring nga ekonomiya han nasud. Lugod, usa ini nga mabug-at nga paras-anon han bug-os nga katawhan, tungod kay katugbang hini an naeksister nga sistema han panlulupot han tuna para ha interes han negosyo ngan imperyalismo nga US.

Ha butnga han natikagrabe nga inhustisya ngan diri pagkakapantay-pantay, mas nalandaw an katukmaan han pagpapasulong han nasyunal demokratiko nga rebolusyon agud ibagsak an imperyalismo, pyudalismo, ngan burukrata kapitalismo. Ha ilarum han demokratiko nga gubyerno han katawhan, wawakayon an monopolyo ha tuna, ipapasulong an nasyunal nga industriya, ig-uundong an talwas nga palisiya nga pan-gawas ngan seseguruhon an kaupayan han masa han katawhan.