Ginbay-og han magkusog nga linog an norte-sentral nga parte han Venezuela, kalakip an syudad han Caracas ngan an rehiyon han La Guaira, hadton kulop han Hunyo 24. Sigon ha mga report, nahitabo an magkasunod nga linog nga mayda kakusgon nga magnitude 7.2 ngan magnitude 7.5 ha giutan han 39 segundo. Tungod ha pagigin hamabaw han gintikangan han linog ha San Sebastiàn fault system, natimpag an damo nga bilding ngan ospital, ngan nawarayan han suplay han kuryente ngan komunikasyon an milyon katawo.

Ha mga report hadton Hulyo 5, haros 3,000 na an nakumpirma nga namatay, sobra 16,000 an nasamaran ngan narunapulo kayukot an ginbibiling pa ha mga natimpag nga bilding. Sobra 16,000 an nawarayan han mauukyan ngan 850 nga bilding an natimpag diin 190 an hul-os gud nga natimpag.

Nagpaabot han pakiduyog ha kasubo ngan rebolusyonaryo nga pakikig-usa an Partido Komunista ng Pilipinas (PKP), National Democratic Front of the Philippines ngan an bug-os nga rebolusyunaryo nga kagiusan Pilipino ha katawhan han Venezuela.

Kadungan hini, ginsukna han PKP an pagsingabot han US ha trahedya para magpwesto han mga tropa ha sakob han Venezuela. Hadton gab-i han Hunyo 25, hinugdon ha Caracas an mga tropa nga Amerikano para direkta nga manginlabot ha mga operasyon han mga sibilyan nga ahensya ha nasud. Kadungan hini, iginpadara han US Southern Command an mga bokis de gerra nga USS Fort Lauderdale ngan USS Billings ha kagadatan nga lupgop han Venezuela, kalakip an mga higante nga transport aircraft nga C-17 Globemaster ngan C-130 Hercules. Ini gihapon nga mga yunit an inatake ha Caracas hadton Enero 3, ngan nagsikmit ha presidente han Venezuela nga hi Nicolas Maduro ngan asawa niya nga hi Cilia Flores.

Sigon ha PKP, makangaralas an paggamit han US ha kalamidad ngan “makatawo nga mga rason” agud manginlabot ha Venezuela labina atubangan han maiha nga panahon nga nag-imponer ini han magdarahug nga sangsyon nga naghibang ha ekonomiya ngan pag-uswag han nasud. Ini nga mga sangsyon, ngan iba pa nga mapanmirit nga pitad han US, gin-gagamit agud pwersahon an gubyerno han Venezuela nga sundon an mga dikta ni Trump.