Wala kaluoy nga ginpatay sang mga tinawo sang 2nd IB ang mag-asawa nga senior citizen nga sila ni Pedro Regala, 78 anyos, kag Florencia Regala, 67 anyos sa Barangay Toboran, Cawayan, Masbate sadtong Pebrero 5, 2024. Ang mga biktima ang ginkuha sa ila puluy-an, gindala sa hilit nga bahin sang sapa, wala-kaluoy nga ginpangtiro, ginbutangan sang ammo pouch kag ginpagwa nga napatay sa engkwentro.

Ginbalandra sa lunangan ang bangkay sang mga tigulang kag ginparada sa social media nga mga “terorista” para hinabunan ang ila makangilidlis nga krimen. Imbolbado sa pagpatay ang yunit sang 2nd IB kag grupo nga paramilitar sa pagpamuno ni Adriel Besana. Ang Barangay sang Toboran ang ginpamugaran sang ALSA MASA nga ginagamit sang militar para magsabwag sang terorismo sa Masbate. Nabalita pa nga lalong sa druga ang mga nagpatay sa mag-asawa.

Pag-aresto. Trese ka sibilyan ang gin-aresto sang mga pwersa sang estado sa nagkalain-lain nga kaso sa Cebu, Negros, Quezon kag Masbate sa nagligad nga semana.

Gin-aresto sang mga pwersa sang estado ang lider-mangunguma nga si Allan Flores sadtong Enero 21 sa iya ulumhan sa Sibagay 2, Barangay Cantabaco, Minglanilla, Cebu. Ginpasakaan siya sang mga kaso nga pagpatay kag tuyo nga pagpatay sa Bohol.

Sa pareho nga adlaw, tatlo ka mangunguma sang Kauswagan sang mga Mangunguma sa Buenavista (KMB) ang gin-aresto sang 94th IB sa Sityo Cantupa-Pisok, Barangay Buenavista, Himamaylan City, Negros Occidental. Ginkilala ang mangunguma nga sila ni Deloy de Leon, Vincies de leon kag Remy Villacanao. Sadtong Enero 22, ginpalutaw sang militar si Vincies de Leon kag ginpasakaan sang kaso nga paslaw nga pagpatay. Wala pa ginapakita ang duha tubtob subong.

Sa Mulanay, Quezon, arbitraryo nga gin-aresto sang pulis ang director sang pelikula kag propesor nga si Jade Castro kag tatlo niya ka abyan sadtong Pebrero 2. Gindalahig sila sa pagsunog sang isa ka e-jeep sa Catanauan sadtong Enero 31. Si Castro ang nagahimo sang progresibo nga pelikula kag kabahin sa nanindugan batuk sa jeepney phaseout.

Sadtong Enero, gin-aresto sang mga pwersa sang estado ang lima ka sibilyan sa Masbate nga gin-akusaran nga mga Pulang hangaway nga nasugapa sang 2nd IB sa Barangay Balantay, Dimasalang sadtong Hunyo 16, 2023. Ang lima amo sila ni Jamara Tumangan, Rowel Hagnaya, Alden Tumangan, Rico Cuyos kag Senen Dollete. Sa aktwal, biktima sila sang pagpaniro sang mga suldado, nga ginkamatay sang isa ka menor-de-edad.

Militarisasyon. Sadtong Enero 30, ginpalukpan sang 96th IB ang mga residente nga nangisog nga mangopras sa kalubihan nga gin-agaw sang militar sa Barangay San Jose, Uson kag Barangay Sawmill, Mobo, Masbate. Sadtong Enero 29, nalista ang mga kaso sang pagpangawat kag iligal nga pagpangukay sang mga CAFGU kag militar sa Hacienda Mortuegue sa banwa sang Pio V. Corpuz kag Esperanza.