Kabaliskaran sa ginawakal sini nga “paglikaw” sa lapnagon nga armadong kinagamo sa Middle East, ginpasangkad sang US ang imperyalista nga gyera sini sa rehiyon. Katimbang ang United Kingdom, halos adlaw-adlaw sini nga ginapaulanan ang mga pwersang Houthi sa North Yemen halin Enero 12.

Ginahambal sang US nga balos nga aksyon ang mga ini batuk sa pagpang-atake sang mga Houthi sa mga barko nga Israeli kag Amerikano nga naga-agi sa kasikbit sa teriroryo sini sa Red Sea. Ang aksyon sang mga Houthi ang pagsuporta sa paghimakas sang Palestine batuk sa henosidyo sang Zionista nga Israel sa Gaza. Ang mga Houthi ang naglunsar sang kaugalingon nga armadong paghimakas batuk sa reaksyunaryo nga estado sang Yemen nga pareho suportado sang Saudi Arabia kag US.

Sadto naman Pebrero 2, nagpaulan ang US sang mga bomba sa 85 ka lokasyon sa Iraq kag Syria, bilang sabat sa pagpang-atake sa Tower 22, isa ka sikreto nga base militar sa Jordan lapit sa dulunan sa Syia, sadtong katapusan sang Enero. Tatlo ka Amerikano nga suldado ang napatay kag 34 ang napilasan sa pagpang-atake. Kapareho sa Yemen, ginlunsar ang pagpangatake sa pasilidad militar sang US bilang pagsuporta sa armado nga pagbato sang mga Palestino sa Gaza. Masobra 27,000 na ang napatay sa Gaza, kung sa diin 11,500 ang bata, kag 66,630 ang napilasan, sa mga pagpamomba sang Zionista nga Israel halin pa Oktobre 7, 2023.

Ang mga pagpamomba sang US, kadungan sang wala katapusan nga pamahog sini sa pumuluyo sang Middle East, ang pamatuod sang pagkagumon sang rehimen Biden sa gyera para pangapinan kag pabakuron ang hegemonya sini sa nagkalain-lain nga bahin sang kalibutan. Kadungan sa pagpaarangkada sa mga kinagamo sa Middle East, ginpalawig sini ang kampanya nga henosidyo sang Israel sa Palestine paagi sa pagharang sa mga tikang para sa untat lupok kag padayon nga pagbubo sang ayuda kag armas sa Zionista nga rehimen. Magluwas diri, ginapalawig man sang US ang 2 ka tuig na nga gyerang proxy sini batuk sa Russia sa Ukraine, sa kahalitan sang pumuluyo nga Ukrainian. Instrumento ang mga gyera nga ini para sa pagkamul sang minilyon nga superginansya sang mga Amerikano nga kumpanya sa armas.