Pagkatapos sang anum ka adlaw nga welga, natulod sang mga mamumugon sang Kowloon House West Avenue sa Quezon City ang kumpaniya nga ipatuman ang dugang nga sweldo kag ihatag ang benepisyo nga madugay na dapat nga ginhatag. Sa negosasyon sadtong Abril 20, nakasugtan ang saka nga ₱20/araw sa sweldo kag paghatag sang maneydsment sang utang sini nga service charge nga ₱570,000 sa mga mamumugon.

Ginkasa ang welga sadtong Abril 15 bilang sabat sa pagpangbarat sang maneydsment sa negosasyon para sa bag-o nga collective bargaining agreement (CBA). Sadtong Abril 8, nagboto ang tanan nga mamumugon nga ikasa ini.

Antes ang welga, ulihi nga tanyag sang kumpaniya ang ₱13 kada adlaw nga dugang-sweldo batuk sa ginagiit sang mga mamumugon nga ₱25. Ang balor nga ini kabahin pa sang dugang nga sweldo nga nakasugtan sa ila 2020-2022 CBA. Mas o menos ₱5.5 milyon na ang wala nahatag sang kumpaniya nga sweldo kag benepisyo.

Nagmadinalag-on ang welga tungod sa kalig-on sang mga mamumugon kag unyon sini nga Glowhrain-KMU-Kowloon House West Chapter, kag sa kalaparon sang suporta halin sa kasubong nga mamumugon, estudyante kag propesyunal kag mga grupo. Bug-os ang pagpasalamat sang unyon sa tanan nga mga nagsuporta sa ila.