Kahuman han unom kaadlaw nga welga, naduso han mga trabahador han Kowloon House West Avenue ha Quezon City an kompaniya nga ipatuman an dugang nga suhol ngan ighatag an benepisyo nga maiha na nga dapat iginhatag. Ha negosasyon hadton Abril 20, ginkasarabutan an umento nga ₱20/adlaw ha suhol ngan paghatag han maneydsment han utang hini nga service charge nga ₱570,000 ha mga trabahador.

Iginkasa an welga hadton Abril 15 komo baton ha pambabarat han maneydsment ha negosasyon para ha bag-o nga collective bargaining agreement (CBA). Hadton Abril 8, binotos an ngatanan nga mga trabahador nga ikasa ini.

Antes an welga, urhi nga gintanyag han kompaniya an ₱13 kada adlaw nga dugang nga suhol kontra ha igin-iinsister han mga trabahador nga ₱25. Ini nga balor kaparte pa han dugang nga suhol nga ginkasarabutan ha ira 2020-2022 CBA. Sumobra-kumulang ₱5.5 kamilyon na an diri nahahatag han kompaniya nga suhol ngan benepisyo.

Nagmadinaugon an welga tungod ha kadig-on han mga trabahador ngan unyon hini nga Glowhrain-KMU-Kowloon House West Chapter, ngan ha kahiluagon han suporta tikang ha igkasi trabahador, estudyante ngan propesyunal ngan mga grupo. Hul-os an pagpasalamat han unyon ha ngatanan nga mga nasuporta ha ira.