Duha ka menor-de-edad sa Northern Samar ang gibalik-balikan sa mga sundalo sa 19th IB sa ilang panimalay sa Barangay Paco, Las Navas aron pugos nga ipa-“surrender” kaniadtong Abril 8. Kining mga kabatan-onan nag-edad og 17 ug 15 anyos.

Mga anak sila sa mag-uumang si Edwar Yanay nga dugay na pud gitarget sa militar sa kampanyang pugos nga pagpasurender tungod sa mga alegasyon nga aduna siya’y kalambigitan sa rebolusyonaryong armadong kalihukan. Gigamit kining pagpasurender kanila aron pugson ang ilang amahan nga mogawas, magpakita, ug pasurenderon usab.

Gipaadto sa mga sundalo ang mag-igsuon sa hedkwarters sa 19th IB sa Barangay Opong, Catubig. Tungod sa kahadlok sa kinamaguwangan, milayas kini sa ilang balay sa Barangay Paco ug wala na siya makita sa ilang pamilya hangtod karon. Gawas kanila, aduna pa’y laing myembro sa pamilyang Yanay ang gipanghasi ug gipanghulga usab sa 19th IB.