Walay ulaw ang imperyalismong US sa paggamit ug pagbutang sa peligro sa mga sibilyang pasilidad ug lugar sa iyang mga operasyon sa Pilipinas. Kauban ang itoy nga Armed Forces of the Philippines (AFP), naghambog pa ang ilang mga upisyal sa gihimong “kinaunhan” nga pagkatag sa gamit-militar sa Mindanao ug pagbalhin niini padulong sa Luzon gamit ang mga barkong sibilyan. Dungan kini sa gilunsad nga patung-patong nga mga war games sukad Enero nga misangko sa giingong pinakakuyanap nga Balikatan karong Abril.

Niadtong Marso 12-15, gipwesto sa US ang mga sakyanan iggugubat sa sibilyang pantalan sa Cagayan de Oro City, ug gibalhin kini padulong sa Subic Freeport gamit ang mga komersyal nga barkong ro-ro. Kauban ang 4th ID, tinagong gihimo ang ilang gitawag nga “rehearsal” o pag-ensayo sa paspas nga pagbalhin ug pagpakaylap sa mga gamit iggugubat sa tibuok arkipelago. Tamparus sa nawong sa mga Cagayanon nga gihimo ang pagpwesto sa mga gamit sa pantalan nga wala nila nahibaloan human sila nagpahayag sa ilang kabalaka sa presensya sa US sa ilang syudad.

Ginamit usab sa US ang Cebu South Port sa ilang gitawag nga Wartime Repair and Maintenance Exercise o SWARMEX niadtong Marso 25. Lambigit sa maong war games ang USS Ashland (LSD-48), usa ka island-class landing ship, nga midunggo sa pyer aron kunoy maghimo og “wartime repair” o pag-ayo sa mga naguba tungod sa gubat. Gitan-aw sa US nga himoong bahin ang Cebu sa ilang gitukod nga “unsinkable repair network” sa mga barkong iggugubat niini sa Asia.

Ang Cagayan de Oro Port ug Cebu South Port parehas mga sibilyang pasilidad. Mga sentro kini sa komersyo ug transportasyon sa mga produkto ug biyahero sa Visayas ug Mindanao. Dako kaayong kadaot sa lokal nga mga ekonomiya kung madamay kini sa gera sa US. Kasamtangan nang ginagamit sa US isip “EDCA site” ang mga landinganan sa duha ka syudad.

Karong Abril, giabri na sa US ang bidding alang sa konstruksyon sa oil depot sa Davao Gulf. Sukad pa niadtong Agosto 2025 gipahibalo ang plano sa pagtukod sa oil depot nga bahin sa estratehikong pagtipig sa lana alang sa mas paspas nga pagmaniobra sa mga pwersa sa US sa panahon sa “high intensity missile environment.” Buot ipasabot, sa bisan unsang panahon mahimong mobuto ang grabeng armadong panagsanga tali sa US ug sa iyang mga kaaway, gamit ang mga misayl ug uban pang armas nga natarget na sa mga base militar niini sa Asia Pacific.

Gipili sa US ang Cagayan de Oro, Cebu ug Davao tungod sa relatibong gilay-on niini sa kasadpang bahin sa nasud, diin nakapwesto ang dagkong Amerikanong base militar. Sumala sa banabana mismo sa US, mapuslanon ang mga lokasyon kay siguradong unang targeton sa iyang mga kaaway ang Subic, Clark ug uban pang base militar niini sa Luzon.

Pagbahinbahin sa mga gamit iggugubat

Ang mga war games sa US sa Cagayan de Oro ug Cebu, ug ang plano nga oil depot sa Davao, nagsubay sa konsepto nga “distributed maritime operations” (DMO). Dinhi, bahinbahinon sa US ang mga gamit, lana, tropa ug armas sa mga isla aron “hikawan og target” ang iyang mga kaaway. Tumong sa mga “rehearsal” mao ang pagbansay sa paspas nga pagbalhin-balhin sa mga himang militar (sakyanan, misayl, kanyon ug uban pa) gamit ang “host-nation infrastructure” o mga pasilidad sa Pilipinas, parehas militar ug sibilyan.

Dili bag-o ang paggamit sa US sa mga sibilyang kabtangan ug serbisyo sa iyang mga operasyong militar. Gitawag nga “21st Century Foraging,” aktibo nga nangita ang US og sibilyang mga pasilidad, rekurso ug serbisyo imbis nga “magsalig sa tradisyunal nga linya sa suplay militar.” Nagmugna kini sa gitawag nga “hybrid militar-sibilyan” nga linya sa suplay.

Sa Pilipinas, naa na’y nakalatag nga “hybrid” nga linya sa suplay sa Clark Airbase ug Subic Freeport, kanhi mga base militar nga karon gipadagan sa mga ahensyang sibilyan. Gipalukup pa kini sa US pinaagi sa pagtukod og mga pabrika ug bodega sa mga export processing zone sa Aurora ug Cagayan.

Target sa mga kaaway sa US

Tinuyuang giangin sa US ang Pilipinas sa paggamit niini sa mga sibilyang imprastruktura ug komunidad alang sa larawng militar. Gipanas niini ang kalainan sa sibilyan ug militar, ug gihimong target ang mga sibilyang kinabuhi, komunidad ug mga kabtangan. Bisan pa’g “rehearsal” lamang kuno ang gihimo nga war games sa Cagayan de Oro ug Cebu, klaro nga gisulayan niini ang katakus sa mga pantalan ug kadagatan isip pagpangandam sa ginapabuto niining imperyalistang gera sa Asia.

Ilalum sa internasyunal nga tawhanong balaod, hugot nga gidili ang pagtarget sa mga sibilyang kabtangan sa panahon sa gubat. Apan kung gamiton kini sa larawng militar, mamahimo kining mga target militar. Tungod kay ginagamit sa militar sa US aron maghatod og mga tangke, misayl ug uban pang gamit iggugubat, ang mga sibilyang barge o ro-ro, apil ang mga pantalan ug landinganan mahimong targeton sa mga kaaway sa US kung mobuto ang gera, ug mabutang sa peligro bisan ang mga mamumuong nagpadagan niini. Gihimo kini sa militar mismo sa US sa pagpamomba niini sa mga sibilyang imprastruktura sa Iran sa pangatarungang nagsilbi kini sa militar nga katakus sa nasud.