Gipatuman sa Bagong Hukbong Bayan (BHB)-South Central Negros (Romeo Nanta Command) ang rebolusyonaryong hustisya pinaagi sa pagpahamtang sa pagsilot nga kamatayon batok sa despotikong agalong yutaan ug lider sa armadong grupong Alsa Masa nga si Philippine Army 2LT Rodolfo Fajardo (Ret) niadtong Abril 12. Giambus sa hukbong bayan si Fajardo sa Barangay Payao, Binalbagan, Negros Occidental.

Gipatuman ang pagsilot sumala sa mando sa hukumang bayan sa erya. Nasentensyahan siyang sad-an sa rebolusyonaryong korte sa mga kaso sa kaylap nga pangangkon sa yuta, daghang pagpamatay, ug grabeng pag-abuso sa gahum. Dili moubos sa 14 ang mga mag-uuma nga gipatay ug gipapatay ni Fajardo sa mga serye sa masaker, pagsunog ug ekstrahudisyal nga pagpatay. Nag-alagad usab siya isip kumander sa detatsment sa Barangay Cansalungon, Isabela niadtong 1985-1986. Busa, malipayon nga giabi-abi sa mga pamilya sa mga biktima ni Fajardo ang pagsilot kaniya.

Samtang, niadtong Abril 16 sa gabii, naglunsad og operasyong haras ang BHB-Northern Negros (Roselyn Jean Pelle Command) batok sa tropa sa 79th IB sa Sityo Tub-an, Barangay Marcelo, Calatrava.