Tigil pasada ken protesta ti Piston. Idi Abril 21, balbaliw nga inkasa ti Piston ti nasaknap a tigil pasada ken protesta ti umili laban iti gera ken kinarigat. Naitakder dagiti sentro ti protesta idiay Metro Manila, Bulacan, Rizal, Iloilo ken Cebu.

Panaglaban iti panagpapanaw kadagiti aglaklako idiay Davao City. Timmakder ken limmaban dagiti aglaklako iti Bankerohan Public Market kontra iti naranggas a panagpatalaw dagiti pulis ken lokal a gubyerno ti Davao City idi Abril 29. Kinumpiskar dagitoy dagiti produkto dagiti aglaklako iti laksid ti panagbayad da iti inaldaw nga abang.

Protesta kontra demolisyon idiay Cavite. Nagprotesta idi Mayo 4 dagiti residente ti Barangay Talaba II, Bacoor City, Cavite tapno kundenaren ti plano a demolisyon iti nasurok 100 kabalbalayan iti komunidad. Mapatpatalaw isuda para iti 420 ektarya a proyekto a reklamasyon ti Frabelle Fishing Corp.

Panagsupyat iti plano a panagminas idiay Camarines Norte. Dismayado dagiti residente ti Paracale, Camarines Norte iti naangay a pangpubliko a konsultasyon idi Abril 23 para iti plano nga open-pit mining iti 321.46 ektarya a daga iti lugar. Kasango dagiti residente iti konsultasyon ti Golden River Mining Corporation ken dagiti mangibagi ti gubyerno a saan a nasayaat a simmungbat kadagiti arungaing da.

Dayalogo iti CHR-Region 5. Nagprotesta ken nakidayalogo dagiti biktima ti panaglabsing iti karbengan-tao idiay Bicol kadagiti pannakabagi ti Commission on Human Rights (CHR)-Region 5 idiay Legazpi City, Albay idi Abril 28. Inallukoy da ti ahensya nga agaramid ti maikanatad nga aksyon seknan iti kumarkaro a red-tagging ken terror-tagging idiay Bicol.