Padpadayawan ti intero a Partido ken amin a rebolusyonaryo a pwersa iti intero a pagilyan ti kinabanwar ti 10 a Nalabbaga a mannakigubat a napasag iti pannakiranget kadagiti pasista a rimmaut idiay Toboso, Negros Occidental idi Abril 19. Agladlangit ti umili iti ipupusay ti nasasayaat nga annak da a sipupuso a nagidaton ti intero a biag da para iti pagimbagan ti masa a maidadanes iti Negros ken iti dangadang ti intero nga umili para iti pudno a wayawaya ken demokrasya.

Agladladingit da met iti ipupusay ti siyam a dadduma pay a saan nga armado nga indibidwal, kabilang ti dua nga ubbing, a naranggas a pinatay dagiti mauyong a soldado ti 79th IB. Karaman kadakwada dagiti kabataan manipud iti syudad a nagturong idiay Toboso tapno sumuporta iti masa a mannalon ken mangmangged-talon iti dangadang da para iti panangilaban iti karbengan da iti daga ken pagbiagan.

Umaw-aweng ti pukkaw ti umili para iti hustisya, kadwa da dagiti ingunguten iti biag dagiti pimmusay idiay Toboso. Agnanayon a nakaimaldit iti kapanunotan ti intero nga umili ti lagip ti biag ti kasasayaatan nga annak ti umili.

Inpakita ti nalawa a masa ti Negros ti ayat ken panangtagiben da kadagiti napasag a Nalabbaga a mannakigubat da, nga iti laksid ti pammutbuteng dagiti pasista a soldado, ket ginasut a kabaryoan da ti simmurot iti punpon. Ti kasdiay a panangipakita ti ayat iti NPA ket ad-adda a mangpatpatibker iti determinasyon dagiti Nalabbaga a mannakigubat nga ituloy ti panagsakripisyo tapno sipupuso a pagserbian ti nalawa a masa ti umili.

Nagsagrap ti nadagsen a dangran ti NPA iti Toboso. Nupay kasta, daytoy ket temporaryo ken marimbawan ti masa ken hukbo ti umili, babaen ti panangadaw kadagiti napait nga adal. Iti lagip dagiti martir a napasag idiay Toboso, ad-adda pay a natibker ti determinasyon ti NPA nga agtuloy nga agpinget iti panangdalyasat iti narimat, numan pay narigat ken nalikaw a dana ti rebolusyonaryo nga armado a dangadang. Naan-anay ti pangngeddeng ti NPA nga agtignay tapno gun-oden ti hustisya para kadagiti biktima ti masaker iti Toboso ken para iti rinibo pay a biktima ti pasista a panangikuspil ti AFP iti Negros ken amin a paset ti pagilyan. Manipud iti daga a sinibugan ti dara dagiti martir ti Toboso ket tumaud ti ad-adu pay a bumangon ken agarmas iti nadumaduma a sona ken larangan gerilya iti intero a pagilyan.

Nasipnget man a kapitulo ti masaker ti Toboso, naikkan lawag daytoy ti kumarkaro a kasasaad, ti agtultuloy a pyudal a panangidadanes, pasista a kinaranggas ti estado, ken nalabes a panagsagaba ti masa a mannalon ken mangmangged-talon iti Negros, nga isu ti makagapu nu apay nga agtultuloy da a bumangbangon ken agar-armas. Ad-adda a limmatak dagiti rason nu apay nga iyabante ti armado a rebolusyon tapno agdepensa ti masa laban iti manangidadanes nga agar-ari a dasig ken dagiti pasista a mangirurumen.

Ad-adda a paggilgil-ayaben daytoy ti tarigagay ti ad-adu pay a kabataan, nangruna dagiti kabataan iti kaaw-awayan a direkta a makapadpadas ti pyudal a panangidadanes ken pasista a kinaranggas, nga agkameng iti hukbo ti umili, ken mangibinglay iti dangadang ti umili para iti wayawaya ti pagilyan ken kagimongan. Ririingen met ti pasamak dagiti kabataan nga intelektwal iti kasyudadan nga agturong iti kaaw-awayan tapno makasursuro iti masa ken makipaset iti panangiyabante ti gubat ti umili.

Iti intero a pagilyan, natibker nga agsubsubbot ti pigsa ti NPA. Agtultuloy a mapalpalawa ken mapapaadu dagiti sona ken larangan gerilya, tapno agipatungpal ti gawaing masa ken agisayangkat kadagiti taktikal nga opensiba. Sadinno man a paset nga agpalpalawa da iti kaaw-awayan, dagiti Nalabbaga a mannakigubat ket nabara a sabsabaten ken nairut nga ar-arakupen ti masa a nainget nga agtartarigagay a lumaban tapno salakniban ti interes ken karbengan da. Ammo da a ti NPA ket armas da laban kadagiti dasig a mangidadanes ken manggungundaway kadakwada. Magagaran da unay a makipaset iti gubat ti umili kas pwersa a pangdepensa iti bagi iti baryo, kas milisya wenno kas soldado ti umili.

Nakatadtadem ti risiris dagiti dasig iti kaaw-awayan. Dumakdakes ti langa ti panangidadanes dagiti apo’t daga iti panangikut ti kinabaknang a suksukayen dagiti mannalon. Nasaknap dagiti kaso ti panagkamkam ti daga ken panangpatalaw kadagiti mannalon, kasta met ti panangipaidam kadagiti mangngalap kadagiti pagkalapan. Awan sarday ti panagsamsam ken panangperdi iti aglawlaw dagiti kumpanya iti minas wenno dagiti plantasyon ti dadakkel a kapitalista a gangannaet ken burgesya komprador. Nu sadinno a sumupsupyat ti masa iti panangidadanes, maipatpataw ti linteg militar tapno pawilan ti panaglaban da.

Para iti masa a mairurumen, ti armado a dangadang ket nainkalintegan ken kasapulan. Masalakniban da laeng ti biag ken pagbiagan babaen ti panagarmas ken panaglaban.

Ti rebolusyonaryo nga armado a dangadang ti kangrunaan a langa ti dangadang iti panangiyabante ti naunday a gubat ti umili tapno gibusan ti manangidadanes ken mananggundaway nga agar-ari a sistema. Maiyab-abante ti armado a dangadang kagiddan ti nadumaduma a langa ti panaglaban ti umili, naparang ken limed, ligal ken iligal, iti kasyudadan ken kaaw-awayan. Ti gubat ti umili ket maysa a gubat ti mannalon gapu ta kangrunaan a nakaturong daytoy iti panangipatungpal ti rebolusyonaryo a programa para iti reporma iti daga.

Ti gubat ti umili ket maysa met a patriyotiko a gubat nga agpangpanggep a labanan ken ibagsak ti neokolonyal nga estado ken ti AFP a baybayadan ti imperyalismo a US. Ad-adda pay tatta a kasapulan nga iyabante daytoy iti sango ti imperyalista a pananggubgubat ti US ken ti ituntunda daytoy a nakaro a krisis iti Pilipinas. Kakumplot ti aso-aso a rehimen Marcos, ti intero a pagilyan ket saksakluten tatta ti pwersa a militar ti US ken dagiti alyado daytoy nga imperyalista a bileg, tapno aramiden a pagrubwatan ti imperyalista a gera. Maiyap-aplag tatta ti dalan tapno bukodan a kamkamen dagiti monopolyo kapitalista nga Amerikano ti daga ken mineral ti pagilyan.

Ad-adda tatta a lumawlawag iti umili a Pilipino nga awan ti sabali a dalan agturong iti pannakasubbot manipud iti imperyalista a panagari ken panagsamsam, nu saan a ti dana ti rebolusyonaryo nga armado a dangadang.

Pagil-ayaben tayo ti dana ti gubat ti umili. Paawengen ti awag kadagiti kabataan a mangmangged, mannalon ken dagiti intelektwal iti kasyudadan, uray iti ruar ti pagilyan, nga agkameng iti New People’s Army. Paawengen ti pukkaw a makipaset iti panagkitikit ti baro a pakasaritaan agturong iti nawaya ken naranyag a masakbayan ti pagilyan.