Kumperensya iti gawaing masa iti kaaw-awayan. Pinullo nga organisador manipud iti intar ti mannalon, mangngalap, mala-mangmangged, babbai, kabataan ken artista ti dimmar-ay iti naisayangkat a kumperensya iti gawaing masa iti kaaw-awayan iti maysa a sikreto a lokasyon idi Abril. Iti panangiyuna ti PKM, natalantan dagiti dokumento nga Addang-addang a Panagorganisa ken Panangbukel ti Organo ti Bileg iti Pulitika tapno penneken nga adalen ti trabaho a rekoberi ken panagpalawa ti rebolusyonaryo a tignay mannalon.

Pangpulitika nga innadal idiay FSMR. Nasurok 20 a kameng ti Partido ken Nalabbaga a mannakigubat ti NPA ti nakaturpos kadagiti innadal iti sidong ti kurikulum ti Nailyan Demokratiko a Pagadalan iti maysa a larangan gerilya iti Far South Mindanao Region (FSMR) idi Abril. Naiyaramid daytoy iti tengnga ti focused military operation (FMO) ti pasista a 37th IB ken 57th IB iti erya. Nagtatalantanan da dagiti bukod a kapadasan, pagkukurangan ken pagkapuyan iti tignay dagiti estudyante. Kalpasan daytoy, ad-adda a nagbalin a determinado ti yunit nga umabante iti nangatngato a tukad ti dangadang.

BKP ti NPA idiay Eastern Visayas. Nakaisayangkat ti NPA- Eastern Visayas ti maysa a bats ti panagadal ti Basaran a Kurso ti Partido (BKP) idi maudi a paset ti Marso. Naiyaramid daytoy iti kangitingitan ti FMO ti 8th ID. Ti naballigi nga innadal ket nangipakita ti umap-apoy a determinasyon ti Nalabbaga a mannakigubat nga ingato ti kabaelan iti ideolohiya. Ipakpakita met daytoy ti kabaelan ti NPA ken ti base a masa iti nangato a tukad ti panaglimed ken panangisakad iti seguridad ti panagadal.