Iti pablaak daytoy idi Mayo 1, immawag ti Revolutionary Council of Trade Unions (RCTU), alyado nga organisasyon ti National Democratic Front of the Philippines, iti dasig a mangmangged a Pilipino nga iggaman ti istorikal a rebbengen nga idaulwan ti demokratiko a rebolusyon ti umili tapno ruk-atan ti pagilyan manipud iti imperyalismo a US, pyudalismo ken burukrata kapitalismo. Tinalmegan ti grupo ti kinapateg ti panagorganisa ti adu a mangmangged tapno maipatungpal daytoy.

Segun iti RCTU, kasapulan a rimbawan ti tignay mangmangged dagiti sakit iti pulitika kas ti ligalismo, ekonomismo, repormismo, NGOismo ken sektoralismo para iti panangiyabante ti gubat ti umili.

Organisaen ti kaadwan a mangmangged nangruna dagiti kon-traktwal tapno maitakder, mapapigsa ken mapalawa dagiti pudno, militante ken anti-imperyalista nga unyon. Saan nga agpaigalut kadagiti ligal a depinisyon iti linteg nu siasino laeng ti mabalin nga agkameng iti unyon.

Patignayen dagiti kameng ti unyon nga agorganisa ti pada da a mangmangged kadagiti pagaw-awidan da a komunidad. Kasapulan a sumungbat iti panagorganisa kadagiti nakurapay iti syudad, kabataan ken babbai kadagiti komunidad. Wagas daytoy tapno maakem ti rebbengen a pagkaykaysaen dagiti mangmangged ken dadduma pay a maikuskuspil a sektor kas bugas ti tignay masa iti kasyudadan.

Ipinget nga iyabante dagiti dangadang a pang-unyon ken pang-ekonomya kas ti umento iti sweldo, panangibasura iti kontraktwalisasyon, pleksible a tegged ken dadduma pay. Nasken met nga idaulwan ken nairut a makikaykaysa dagiti mangmangged kadagiti nailyan a dangadang.

Iti taray ti panangiyabante dagiti kampanya ken dangadang ti masa, rumbeng nga iyaramid ti amin a porma ti propaganda ken panagadal. Kasapulan nga ipasaknap dagiti panagamiris ti RCTU kadagiti inaldaw-aldaw nga isyu ken idatag ti alternatibo a programa ti demokratiko a rebolusyon ti umili.

Iti tay-ak ti organisasyon, kasapulan a buklen dagiti sangay ti Communist Party of the Philippines kadagiti empresa tapno paadwen ken papigsaen dagiti rebolusyonaryo nga unyon. Kagiddan daytoy, kasapulan nga urnongen dagiti abante a mangmangged kadagiti Pulang Brigada ng mga Manggagawa (PBM) iti tunggal departamento wenno linya ti trabaho kadagiti empresa, kadagiti shift, ken/wenno kadagiti komite ti unyon.

Ti sangay ti Partido, kabadang dagiti balangay ti PBM, ti mangbukel iti rebolusyonaryo a konseho iti uneg ti pabrika. Ti umad-adu a rebolusyonaryo a konseho ti mangbukel iti nailyan a pormasyon ti RCTU. Kaipapanan ti panagpigsa ti RCTU ket ti dumakdakkel a suporta para iti armado a dangadang ti New People’s Army (NPA) iti kaaw-awayan.

RCTU idiay Laguna. Idi Abril 29-30, nagibunong ti RCTU kadagiti polyeto nga aglalaon kadagiti pablaak daytoy kadagiti sentro a syudad ti Laguna. Ginasut a polyeto ti naiwaras tapno allukoyen dagiti mangmangged nga agtignay ken makipaset iti demokratiko a rebolusyon ti umili.