Immaweng kadagiti kalsada iti intero a pagilyan ken uray iti ballasiw-taaw ti protesta ken tignay ti nasurok 30,000 Pilipino idi Mayo 1, Sangalubongan nga Aldaw ti Tegged. Militante da a timmakder para iti umento iti sweldo, panagbaba iti presyo ti langis ken gagatangen ken panaggibus ti gera nga agresyon ti US-Israel iti Iran.

Idiay Manila, nagmartsa ti rinibo a mangmangged ken anakling-et agturong idiay Mendiola. Ti tignay ket inyuna ti National Wage Coalition a bukbuklen ti Kilusang Mayo Uno (KMU), Bukluran ng Manggagawang Pilipino, Nagkaisa Labor Coalition, ken Trade Union Congress of the Philippines. Nakikaykaysa met iti martsa ti Labor Consultative Assembly a binukel ti Caritas Philippines, Laban Manggagawa ken dadduma pay a grupo. Gapu ta pinalikmutan ti rinibo a pulis ti Malacañang, napilitan dagiti mangmangged nga agprograma laengen iti interseksyon ti Nicanor Reyes ken Recto Avenue. Kalpasan daytoy, inyuna ti KMU ti martsa agturong iti embahada ti US. Immawag da a dagus a gibusan ti gera nga agresyon ti US-Israel iti Iran a mangituntunda ti awan-kapada a krisis iti Pilipinas ken intero a lubong.

Iti ruar ti Metro Manila, adda dagiti tignay iti panangiyuna ti KMU kadagiti syudad ti Baguio, Angeles, Calamba, Legazpi, Tacloban, Cebu, Iloilo, Bacolod, Davao ken kadagiti sentro nga ili ti Zambales, Bataan, Bulacan, Cavite, Aklan, Capiz, Iloilo City ken Dinagat Islands. Iti ballasiw-taaw, indaulwan ti Migrante ti protesta dagiti migrante a mangmangged a Pilipino iti pito a syudad iti US, Canada, United Kingdom, France, the Netherlands, Germany, Italy, Hong Kong, South Korea ken Japan.