Sipapasnek ti National Democratic Front of the Philippines (NDFP) ken dagiti alyado nga organisasyon daytoy iti panagpalawa ken panagpauneg iti panagramut iti masa a Pilipino, agpada iti kasyudadan ken kaaw-awayan. Naregta a nagandar dagiti aktibidad ti NDFP manipud idi insayangkat ti rebolusyonaryo a tignay ti maysa a tignay panagilinteg idi Disyembre 2023.

Iti maika-53 anibersaryo daytoy, paspasingkedan ti NDFP ti akem daytoy kas pinakakonsolidado nga organisado a pwersa ti nagkaykaysa a prente ti umili a Pilipino para iti demokratiko a rebolusyon ti umili. Pagad-adawan daytoy ti adal dagiti balligi ken kamkamali manipud nabukel idi Abril 24, 1973.

Segun iti Nailyan a Kalihiman ti NDFP, ti panagregta daytoy kas maysa a rebolusyonaryo nga alyansa ket nakabasar iti panangpapigsa kadagiti rebolusyonaryo nga organisasyon ti masa a paset daytoy. Addaan daytoy ti 18 alyado nga organisasyon iti agdama.

Iti napalabas a dua a tawen, nakaisayangkat ti NDFP kadagiti kumperensya dagiti limed nga organisasyon ti masa tapno agkaykaysa iti takder kadagiti nababara nga isyu, agbibinninglay kadagiti kapadasan ken parikut iti panagorganisa ken panagtignay. Naplano met ditoy ti nagkaykaysa nga aktibidad iti panangriing iti masa ken panangiyaramid kadagiti tignay protesta kas ti rali nga apagdarikmat, operasyon pinta-operasyon dikit (OP-OD) ken dagiti programa iti kultura.

Inallukoy met ti NDFP dagiti alyado daytoy nga agipablaak kadagiti pagiwarnak ken nangted ti regular a panagsanay iti trabaho iti propaganda. Nagbalin a naregregta dagiti innadal dagiti organisasyon ti masa, nakaimalditen ti apagapaman a panaglawa ken nakairuswat kadagiti nailyan a konggreso ken pulong ti nailyan a konseho ti sumagmamano nga alyado nga organisasyon. Nairut nga inyabante ti NDFP ken dagiti alyado daytoy ti 12-punto a programa ti alyansa.

Iti sango dagiti imperyalista a gubat ken agresyon ti US iti agdama, immawag ti NDFP kadagiti alyado daytoy ken iti umili a Pilipino nga iyabante ti maysa nga aktibo, nawaya ken natalinaay a patakaran a pangruar tapno ilaban ti kinatalged ti pagilyan. Kuna daytoy, nasken a sipipinget nga iyabante ti demokratiko a rebolusyon ti umili kas kaykaysuna a sungbat iti krisis nga ituntunda ti imperyalismo a US.

Panagrambak ti anibersaryo

Kadagiti napalabas a lawas, nagiyaramid ti nadumaduma nga aktibidad dagiti alyado ti NDFP tapno rambakan ti maika-53 anibersaryo daytoy. Insayangkat da ti agsisina a rali nga apagdarikmat, panangibunong ti polyeto ken dagiti tinnalantan ken innadal.

Dagitoy ket insayangkat ti Kabataang Makabayan, Katipunan ng mga Gurong Makabayan, Liga ng Agham para sa Bayan, Makabayang Samahang Pangkalusugan, Artista at Manunulat ng Sambayanan ken Compatriots. Adda met dagiti naangay idiay Metro Manila ken Batangas, pati idiay Australia. Iti uneg dagiti larangan gerilya, nagrambak met ti New People’s Army kadwa ti Pambansang Katipunan ng mga Magbubukid.

Nagipablaak ti kablaaw ti NDFP ken dadduma pay nga alyado nga organisasyon ken dagiti balangay daytoy. Nangidanon met ti kablaaw dagiti internasyunal a partido ken organisasyon kabilang ti Friends of the National Democratic Front/Friends of the Filipino People in Struggle.