Agsaruno a protesta ti insayangkat ti nadumaduma a grupo laban iti Balikatan ken dagiti imperyalista a gera ti US iti nadumaduma a paset ti lubong. Idi Abril 22, nagmartsa dagiti grupo a pangkalikasan ken dadduma pay nga organisasyon manipud Taft Avenue, Manila paturong idiay US Embassy kas pananglagip iti Earth Day. Kinundenar da ti rehimen US-Marcos iti panagserrek iti “Pax Silica” ken pagsungsungbaten da ti US ken Israel iti pananggubgubat dagitoy iti Middle East a nangitunda ti nakakaro a dangran iti kagimongan ken kalikasan iti Asia.

Idi Abril 28, nagturong met iti embahada ti US dagiti estudyante ken lider Moro iti sidong ti Youth for Justice and Peace tapno iyawag ti pananggibus ti gera ti US iti Iran. Awag da nga ibasura ti Enhanced Defense Cooperation Agreement a napirmaan idi Abril 28, 2014.

Idi Abril 23, nagtitipon dagiti organisasyon ti akademiko, progresibo, relihiyoso dagiti artista ken dadduma pay tapno iruswat ti Stop the US-Israel War in Iran Campaign Network. Naiyaramid daytoy iti Bulwagang Tandang Sora iti University of the Philippines-Diliman, Quezon City. Naitakder ti network tapno agserbi a nalawa nga alyansa dagiti grupo ken indibidwal a sumupsupyat iti gera nga agresyon ti US idiay Iran, Palestine ken Lebanon. Maitaktakder dagiti kapada a network iti tukad rehiyon ken lokalidad iti pagilyan.