Agsasaruno a paborable a desisyon ti nagun-od ti umili laban iti pasismo ken korapsyon ti bunggoy a Duterte. Pimmaspas daytoy Abril ti panaggunay ti kaso iti International Criminal Court laban ken Rodrigo Duterte kanaig ti ubbaw a gera na kontra droga. Iti uneg ti pagilyan, maysa nga addang laengen ket balbaliwen nga i-impeach ti Kongreso ti anak na a ni Sara Duterte.

Idi Abril 22, pinal nga inbasura ti Appeals Court ti ICC ti apela ni Duterte tapno ibasura dagiti kaso kenkwana iti rason a saan a sakop ti ICC dagitoy. Inpinal ti korte ti keddeng nga adda hurisdiksyon ti ICC kadagiti krimen laban iti sangkataw-an, kangrunaan ti pammapatay, a napasamak iti baet ti Nobyembre 1, 2011 ken Marso 16, 2019.

Kabigatanna, kinumpirma ti Pre-Trial Chamber I dagiti darum laban iti dati a presidente. Dagus met a nabukel ti Trial Chamber III a mangdengngeg kenkwana.

Idi Abril 28, naiyanunsyon ti tallo a huwes a mangbukel ti Trial Chamber III. Mangipaawag daytoyen ti pulong dagiti abugado ti prosekusyon, depensa ken dagiti biktima inton Mayo 28. Segun kadagiti eksperto, mabalin a mangrugi ti pormal a panagdengngeg iti maudi a paset ti 2026, wenno nasapa a paset ti 2027.

Kabayatanna, iti Pilipinas, nagbotos ti Committee on Justice ti Konggreso ti 55-0 idi Mayo 4 para iti impeachment ken Sara Duterte kalpasan nga ideklara daytoy nga adda ti “probable cause” wenno naan-anay a basaran dagiti kaso a naipila laban kenkwana. Napasamak ti panagbobotos kalpasan ti nasurok dua a bulan a deliberasyon ti komite.

Inaramid a basaran ti konggreso ti maikadwa ken maikatlo a naidasar a reklamo nga impeachment a pinagmaymaysa daytoy kadagiti sumagannad a reklamo:

1. nakaro a panagpangta/panagplano ti asasinasyon: Nakaipasidong ditoy dagiti pangpubliko a pangta ni Duterte a papatayen wenno ipapatay ni Ferdinand Marcos Jr, ti asawa na a ni Liza ken ti dati a House Speaker Martin Romualdez.
2. kamali a panagaramat ken malversation (korapsyon) ti confidential funds: Paset ditoy ti iligal ken kamali a panagaramat iti ₱612.5 milyon a confidential/intelligence funds ti Office of the Vice President ken ti Department of Education idi isuna ket kalihim ti departamento.
3. saan a maipalawag a kinabaknang/mapagdudwaan a transaksyon iti bangko: Paset daytoy dagiti naibunannag a transaksyon iti nadumaduma a bangko ti gatad a ₱6.7 bilyon nga addaan kainaigan ken Duterte ken ti asawa na a ni Mans Carpio. Dagiti transaksyon ket nakumpirma iti rekord ti Anti-Money Laundering Council.

Nakaituding a pagbotosan iti plenaryo ti Kongreso ti reklamo inton Mayo 11. Nu agbotos ti 1/3 ti plenaryo para ditoy, dagus a maipatulod daytoy iti Senado para iti pormal a panagdengngeg.