Dua a masaker nga inyaramid ti militar ken pulis iti Bangsamoro ti papaimbestigaran dagiti salaknib ti karbengan-tao. Immawag ti Moro-Christian Peoples Alliance (MCPA) para iti independyente nga imbestigasyon iti narungsot a pammapatay ti Armed Forces of the Phlippines (AFP) iti 10 Moro nga ak-akusaran da a kameng ti Dawlah Islamiya-Maute Group idiay Barangay Banga-Pantar, Marantao, Lanao del Sur idi Abril 17.

Segun iti istorya ti pulis, kadwa da dagiti soldado, idasdasar da kano ti warrant of arrest laban kada Amerol Mangonraka ken Benjie Amor Macabato, idi adda ti “atiddog a putukan.” Kalpasan kano ti putukan, nagparang ti natay a bagi ti dua, karaman dagiti asawa da ken innem pay nga inakusaran ti militar a “mannakigubat.” Nabigbig dagiti napatay a da Nahara Khairiya S. Hamim, Jamail Ibrahim, Fahmi Aminodin, Sohaile Borud Bato ken Mohaimen Aragon. Maysa kadakwada ket estudyante ti Mindanao State University idiay Marawi City.

Ngem segun iti istroya dagiti residente, awan ti napasamak a napaut a putukan iti lugar iti oras a dakdakamaten dagiti pulis ken soldado. Segun kadagiti makaam-ammo, sumagmamano kadagiti pinatay a biktima ket siguden a simmuko iti gubyerno. Inyulat ti MCPA ti panagsaknap ti buteng iti insidente. Adu nga ubbing a lallaki ti pimmanaw iti komunidad iti buteng a kamali a mapabasol dagitoy.

Idiay Zamboanga City, pinatay dagiti tauhan ti pinagtipon a pwersa ti AFP ken Philippine National Police (PNP) ti tallo a kameng ti maysa a pamilya idiay Barangay Sinunuc, Zamboanga City idi April 23, ala-una ti parbangon iti naideklara a maysa a “lehitimo nga operasyon ti pulis.”

Natay iti insidente ni Jerry Alfad, 52, maysa a lupon iti barangay, Salam Alfad, 12, ken ni Rayyan Alfad, 22, kaanakan ni Alfad. Nasugatan met ni Mislie Aradais Alfad, Sayra Alfad ken Saralyn Alfad, SK Kagawad. Segun kadagiti kapamilya da, nalawag a napaltogan dagiti biktima bayat a nakaidda, basar iti kinaadu ken direksyon ti tama ti bala iti kama. Natatek met ti bala ti intero a balay.