Duha ka masaker nga gihimo sa militar ug pulis sa Bangsamoro ang gipaimbestigahan sa mga tigpanalipod sa tawhanong katungod. Nanawagan ang Moro-Christian Peoples Alliance (MCPA) para sa usa ka independente nga imbestigasyon sa walay kaluoy nga pagpatay sa Armed Forces of the Philippines (AFP) sa 10 ka Moro nga ginaakusahang mga myembro sa Dawlah Islamiya–Maute Group sa Barangay Banga-Pantar, Marantao, Lanao del Sur niadtong Abril 17.

Sumala sa istorya sa pulis, nagtunol kuno sila, uban ang mga sundalo, og warrant of arrest batok kang Amerol Mangonraka ug Benjie Amor Macabato, sa dihang nahitabo ang “lungtad nga pinusilay.” Human kuno sa pinusilay, nakit-an ang patay nga lawas sa duha, uban ang ilang mga asawa, ug unom pa nga giakusahan sa militar nga mga “manggugubat.” Nailhan ang mga napatay nga silang Nahara Khairiya S. Hamim, Jamail Ibrahim, Fahmi Aminodin, Sohaile Borud Bato, ug Mohaimen Aragon. Usa kanila estudyante sa Mindanao State University sa Marawi City.

Pero sumala sa istorya sa mga residente, walay nahitabong lungtad nga pinusilay sa lugar sa oras nga giingon sa mga pulis ug sundalo. Sumala sa mga nakaila, ang uban sa mga gipatay nga biktima dugay na nisurender sa gubyerno. Gitaho sa MCPA ang pagkaylap sa kahadlok tungod sa insidente. Daghang batan-ong kalalakin-an ang namahawa sa komunidad sa kahadlok nga basig mapahimungtan o malambigit sa pasangil.

Sa Zamboanga City, gipatay sa mga sakop sa hiniusang pwersa sa AFP ug Philippine National Police (PNP) ang tulo ka myembro sa usa ka pamilya sa Barangay Sinunuc, Zamboanga City niadtong April 23, ala-1 sa kaadlawon sa gideklarar nga usa ka “lehitimong operasyong pulis.” Namatay sa insidente si Jerry Alfad, 52, usa ka upisyal sa barangay, si Salam Alfad, 12, ug si Rayyan Alfad, 22, pag-umangkon ni Alfad. Samtang samdan silang Mislie Aradais Alfad, Sayra Alfad ug Saralyn Alfad, usa ka SK Kagawad. Sumala sa mga kabanay, klaro nga gipusil ang mga biktima samtang nanghigda, base sa gidaghanon ug direksyon sa igo sa bala sa kama. Tadtad sab og bala ang tibuok balay.