Bug-os ang paningkamot sa National Democratic Front of the Philippines (NDFP) ug sa mga alyadong organisasyon niini sa pagpalapad ug pagpalawom sa paggamot sa masang Pilipino, sa kasyudaran man o sa kabukiran. Kusgan nga mikaylap ang mga aktibidad sa NDFP sukad sa paglunsad sa rebolusyonaryong kalihukan sa usa ka kalihukang pagtul-id niadtong Disyembre 2023.

Sa ika-53 nga anibersaryo niini, gipalig-on sa NDFP ang iyang papel isip pinakakonsolidadong organisadong pwersa sa nagkahiusang prente sa katawhang Pilipino alang sa demokratikong rebolusyon sa katawhan. Nagkuha kinig pagtulun-an gikan sa mga kadaugan ug kasaypanan sukad sa pagkatukod niini niadtong Abril 24, 1973.

Sumala sa Pambansang Kalihiman sa NDFP, ang paglagsik niini isip usa ka rebolusyonaryong alyansa nagdepende sa pagpalig-on sa mga rebolusyonaryong organisasyong masa nga kabahin niini. Aduna kiniy 18 ka alyadong organisasyon sa pagkakaron.

Sa milabayng duha ka tuig, nakapahigayon ang NDFP og mga kumperensya sa mga tago nga organisasyong masa aron magkahiusa sa baruganan sa mga init nga isyu, magpaambitay og mga kasinatian ug mga problema sa pag-organisa ug paglihok. Giplano usab dinhi ang hiniusang aktibidad sa pagpukaw sa masa ug paghimo og mga lihok-protesta sama sa raling-iglap, operasyon pinta-operasyon dikit (OP-OD) ug mga programa sa kultura.

Gidasig usab sa NDFP ang mga alyado niini nga magpagula sa ilang mga mantalaan ug naghatag og regular nga mga pagbansay sa gimbuhatong propaganda. Nahimong mas madasigon ang mga pagtuon sa mga organisasyong masa, nakataho na og gamay nga paglapad, ug nakapahigayon og mga nasudnong kongreso ug tigum sa nasudnong konseho ang pipila ka alyadong organisasyon. Hugot nga giasdang sa NDFP ug sa mga alyado niini ang 12-puntong programa sa alyansa.

Atubangan sa mga imperyalistang gubat ug agresyon sa US sa pagkakaron, nanawagan ang NDFP sa mga alyado niini ug sa katawhang Pilipino nga iasdang ang usa ka aktibo, gawasnon, ug malinawong polisiya sa gawas sa nasud aron panalipdan ang kaluwasan sa nasud. Matud pa niini, kinahanglang todo nga isulong ang demokratikong rebolusyon sa katawhan isip bugtong tubag sa krisis nga dala sa imperyalismong US.

Pagsaulog sa anibersaryo

Sa milabayng mga semana, nagpahigayon og nagkalain-laing aktibidad ang mga alyado sa NDFP aron saulogon ang ika-53 nga anibersaryo niini. Naglunsad sila og managlahing raling-iglap, OP-OD, pag-apud-apud og polyeto, ug mga diskusyon ug pagtuon.

Ang maong mga aktibidad gihimo sa Kabataang Makabayan, Katipunan ng mga Gurong Makabayan, Liga ng Agham para sa Bayan, Makabayang Samahang Pangkalusugan, Artista at Manunulat ng Sambayanan ug Compatriots. Adunay gipahigayon sa Metro Manila ug Batangas, lakip na sa Australia. Sa sulod sa mga natarang gerilya, nagsaulog usab ang Bagong Hukbong Bayan uban ang Pambansang Katipunan ng mga Magbubukid.

Nagpagawas og mensahe sa pagpahalipay sa NDFP ang uban pang alyadong organisasyon ug ang mga balangay niini. Nagpadangat usab og pahalipay ang mga internasyunal nga partido ug organisasyon lakip na ang Friends of the National Democratic Front/Friends of the Filipino People in Struggle.