Nagahatag og taas nga pagsaludo ang tibuok Partido ug ang tanang rebolusyonaryong pwersa sa tibuok nasud sa pagkabayanihon sa 10 ka Pulang manggugubat nga napukan sa pagpakig-away batok sa mga pasistang misulong sa Toboso, Negros Occidental niadtong Abril 19. Naghilak ang katawhan sa pagkamatay sa ilang mga buotang anak nga walay kaikog nga naghalad sa ilang tibuok kinabuhi alang sa kaayohan sa mga dinaugdaug nga masa sa Negros ug sa pakigbisog sa tibuok nasod alang sa tinuod nga kagawasan ug demokrasya.

Naguol usab sila sa kamatayon sa siyam ka uban pang walay armas nga indibidwal, lakip ang duha ka bata, nga walay puangod nga gipamatay sa mga mapintas nga sundalo sa 79th IB. Kauban nila ang mga batan-on gikan sa mga syudad ug ubang nasod nga miadto sa Toboso aron mosuporta sa masang mag-uuma ug mamumuo panguma sa ilang mga pakigbisog alang sa pagpanalipod sa ilang mga katungod sa yuta ug panginabuhian.

Uban sa mga minahal sa kinabuhi sa mga namatay sa Toboso, naglanog ang singgit sa katawhan alang sa hustisya. Hangtod sa hangtod nga nakapatik sa panumduman sa tibuok katawhan ang handumanan sa kinabuhi sa labing maayo ug buotang mga anak sa nasud.

Gipakita sa lapad nga masa sa Negros ang ilang gugma ug pag-amuma sa ilang mga napukan nga Pulang manggugubat sa dihang—bisan sa pagpanghadlok pa sa mga pasistang sundalo—gatusan sa ilang mga isig-kabaryo ang nikuyog sa paglubong.

Ang ingon niining pagpakita og gugma ngadto sa BHB samot nga nagapalig-on sa determinasyon sa mga Pulang manggugubat nga ipadayon ang ilang pagsakripisyo aron tibuok-kasingkasing nga alagaran ang lapad nga masa sa katawhan.

Nahiagom og bug-at nga kadaut ang BHB sa Toboso. Apan, temporaryo lamang kini ug mabuntog ra sa masa ug sa hukbong bayan, pinaagi sa pagkuha og pait nga mga pagtulon-an. Pinaagi sa paghandum sa mga martir nga napukan sa Toboso, mas milig-on ang determinasyon sa BHB nga padayong maningkamot sa pagsubay sa masanag, bisan pa man og lisod ug liko-liko nga dalan sa rebolusyonaryong armadong pakigbisog. Bug-os ang desisyon sa BHB nga molihok aron kab-oton ang hustisya alang sa mga biktima sa masaker sa Toboso ug alang sa linibo pang mga biktima sa pasistang pagpanglupig sa AFP sa Negros ug sa tanang suok sa nasud. Gikan sa yuta nga gibisbisan sa dugo sa mga martir sa Toboso, maggikan ang mas daghan pang mobangon ug moarmas sa nagkalain-laing sona ug nataran sa gerilya sa tibuok nasud.

Ngitngit man nga panahon ang masaker sa Toboso, gihatagan niini og kahayag ang nagkagrabe nga kahimtang, ang padayon nga pyudal nga pagpangdaugdaug, pasistang pagpanghasi sa estado, ug ang labihang pag-antus sa masang mag-uuma ug mamumuo panguma sa Negros, nga maoy mga rason nganong padayon silang nagabangon ug naga-armas. Mas niklaro ang mga rason nganong angay iasdang ang armadong rebolusyon aron panalipdan ang masa batok sa madaugdaugon nga mga nagharing hut-ong ug sa ilang mga pasistang tigpanglupig.

Mas gipadilaab niini ang tinguha sa mas daghan pang mga batan-on, ilabi na kadtong mga batan-on sa kabanikanhan nga direktang nakasinati sa pyudal nga pagpanglupig ug pasistang pagpanghasi, nga mosampa sa hukbong bayan, ug moamot sa pakigbisog sa katawhan alang sa nasudnon ug katilingbanong kalingkawasan. Gipukaw usab niini ang mga batan-ong intelektwal sa kasyudaran nga moadto sa kabanikanhan aron magtuon gikan sa masa ug moapil sa pag-asdang sa gubat sa katawhan.

Sa tibuok nasud, lig-on nga nagabawi og kusog ang BHB. Padayong gipalapad ug gipadaghan ang mga sona ug nataran sa gerilya, para sa paglunsad og gimbuhatong masa ug mga taktikal nga opensiba. Bisan asang dapita nga nagapalapad sa kabanikanhan, mainitong gisugat ug hugot nga gigakos ang mga Pulang manggugubat sa masa nga naghingaping tinguha ang mosukol aron panalipdan ang ilang interes ug mga katungod. Nasayod sila nga ang BHB maoy ilang hinagiban batok sa mga hut-ong nga nagdaugdaog ug nagpahimulos kanila. Andam kaayo silang mosalmot sa gubat sa katawhan isip mga pwersa sa kaugalingong depensa sa baryo, isip milisya o isip mga sundalo sa hukbong bayan.

Hait kaayo ang panagbangi sa mga hut-ong sa kabanikanhan. Nagkagrabe ang porma sa pagpangdaugdaug sa mga agalong yutaan sa pag-angkon sa bahandi nga gitikad sa mga mag-uuma. Kaylap ang mga kaso sa pagpangilog og yuta ug pagpalayas sa mga mag-uuma, ingon man ang pagpanghikaw sa mga mananagat sa ilang gipangisdaan. Walay undang ang pagpangawat ug pagguba sa kinaiyahan sa mga kumpanya sa pagmina o mga plantasyon sa mga dagkong kapitalistang langyaw ug burgesyang komprador. Kung asa naay pagsupak ang masa sa pagpangdaugdaug, didto usab ang balaud militar aron sumpuon ang ilang pagsukol.

Alang sa masang linupigan, ang armadong pakigbisog mao ang makiangayon ug kinahanglan. Mapanalipdan lamang nila ang ilang kinabuhi ug panginabuhian pinaagi sa pag-armas ug pag-alsa.

Ang rebolusyonaryong armadong pakigbisog mao ang nag-unang porma sa pakigbisog sa pag-asdang sa malungtarong gubat sa katawhan aron tapuson ang madaugdaugon ug mapahimuslanong nagharing sistema. Ginasulong ang armadong pakigbisog dungan ang nagkalain-laing porma sa pagsukol sa katawhan, dayag ug sekreto, ligal ug iligal, sa kasyudaran ug kabanikanhan. Ang gubat sa katawhan usa ka gubat sa mag-uuma tungod kay ang nag-una niining duso mao ang pagpatuman sa rebolusyonaryong programa alang sa reporma sa yuta. Usa usab ka patriyotikong gubat ang gubat sa katawhan nga nagtinguhang suklan ug pukanon ang neokolonyal nga estado ug sa AFP nga binayran sa imperyalismong US.

Mas kinahanglan kining iasdang karon atubangan sa imperyalistang pagpanggubat sa US ug sa dala niining grabeng krisis sa Pilipinas. Kakunsabo ang papet nga rehimeng Marcos, gipatigbabawan karon ang tibuok nasud sa pwersang militar sa US ug sa mga alyado niining imperyalistang gahum, aron himuong lunsaranan sa imperyalistang gubat. Giandam na karon ang dalan aron solong maangkon sa mga monopolyo kapitalistang Amerikano ang yuta ug mineral sa nasud.

Mas tin-aw na karon sa katawhang Pilipino nga walay laing dalan paingon sa kaluwasan gikan sa imperyalistang paghari ug pagpanglungkab, gawas sa dalan sa rebolusyonaryong armadong pakigbisog.

Padilaabon nato ang dalan sa gubat sa katawhan. Ipalanog ang panawagan sa mga batan-ong mamumuo, mag-uuma ug mga intelektwal sa kasyudaran, apil na ang naa sa gawas sa nasud, nga mosampa sa Bagong Hukbong Bayan. Ipalanog ang singgit nga moapil sa paglilok sa bag-ong kasaysayan ngadto sa gawasnon ug lamdag nga kaugmaon sa nasud.