Hunong-biyahe ug protesta sa Piston. Niadtong Abril 21, naglunsad makausab ang Piston og halapad nga hunong-biyahe ug protesta sa katawhan batok sa gubat ug kalisod. Gitukod ang mga sentro sa protesta sa Metro Manila, Bulacan, Rizal, Iloilo, ug Cebu.

Pagsukol sa pagpalayas sa mga manindahay sa Davao City. Mibarog ug nagprotesta ang mga manindahay sa Bankerohan Public Market sa Davao City batok sa bangis nga pagpalayas sa kapulisan ug lokal nga panggamhanan sa Davao City niadtong Abril 29. Gikompiskar ang mga produkto sa mga manindahay bisan pa adlaw-adlaw ang ilang pagbayad og abang.

Protesta batok sa demolisyon sa Cavite. Nagprotesta niadtong Mayo 4 ang mga residente sa Barangay Talaba II, Bacoor City, Cavite aron kondenahon ang planong demolisyon sa kapin 10 ka panimalay sa komunidad. Gipapahawa sila alang sa 420 ka ektarya nga proyekto sa reklamasyon sa Frabelle Fishing Corp.

Pagsupak sa plano nga pagmina sa Camarines Norte. Wala nalipay ang mga residente sa Paracale, Camarines Norte sa gipahigayong konsultasyon sa publiko niadtong Abril 23 alang sa planong open-pit nga pagmina sa 321.46 ka ektarya sa yuta sa maong lugar. Giatubang sa mga residente sa konsultasyon ang Golden River Mining Corporation ug mga representante sa gobyerno nga wala’y hustong gitubag sa ilang mga reklamo.

Dayalogo sa CHR-Region 5. Nagprotesta ug nagpahigayon og dayalogo ang mga biktima sa pagpanglapas sa tawhanong katungod sa Bicol ngadto sa mga representante sa Commission on Human Rights-Region 5 sa Legazpi City, Albay niadtong Abril 28. Ilang giawhag ang ahensya nga mohimo og tukmang aksyon kalabot sa nagkakusog nga red-tagging ug terror-tagging sa Bicol.