Sunud-sunod nga mga protesta ang gilunsad sa nagkalain-laing grupo batok sa Balikatan ug imperyalistang gubat sa US ngadto sa lain-laing bahin sa kalibutan. Niadtong Abril 22, nagmartsa ang mga grupong pangkinaiyahan ug uban pang organisasyon gikan sa Taft Avenue, Manila paingon sa US Embassy isip paghinumdom sa Earth Day. Ilang gikundena ang rehimeng US-Marcos sa pagsulod niini sa”Pax Silica” ug gipapanubag ang US ug Israel sa ilang gubat sa Middle East nga nagresulta sa grabeng kadaot sa katilingban ug kinaiyahan sa Asia.

Kaniadtong Abril 28, miadto usab sa embahada sa US ang mga estudyante ug mga lider sa Moro ubos sa Youth for Justice and Peace aron ipanawagan ang pagtapos sa gubat sa US sa Iran. Nanawagan sila nga ibasura ang Enhanced Defense Coorperation Agreement nga gipirmahan kaniadtong Abril 28, 2014.

Niadtong Abril 23, naghiusa ang mga organisasyon sa mga akademiko, progresibo, relihiyoso, arte, ug uban pa aron ilunsad ang Stop the US-Israel War in Iran Campaign Network. Gipahigayon kini sa Tandang Sora Hall sa University of the Philippines-Diliman, Quezon City. Gitukod ang network aron magsilbi nga lapad nga alyansa sa mga grupo ug indibidwal nga supak sa gubat sa agresyon sa US didto sa Iran, Palestine, ug Lebanon. Gitukod ang susamang mga network sa rehiyon ug lokalidad nga lebel sa nasod.