Nidagsang sa mga dalan sa tibuok nasud ug bisan sa gawas sa nasud ang protesta ug lihok sa kapin 30,000 ka Pilipino niadtong Mayo 1, Kalibutanong Adlaw sa Pamuo. Militante silang nibarug para sa umento sa suholan, pagpaubos sa presyo sa lana ug mga palaliton, ug pagtapos sa gubat sa agresyon sa US-Israel sa Iran.

Sa Maynila, nagmartsa ang libuang mamumuo ug anak sa buhat padulong sa Mendiola. Gipangulohan ang lihok sa National Wage Coalition nga gilangkuban sa Kilusang Mayo Uno (KMU), Bukluran ng mamumuong Pilipino, Nagkaisa Labor Coalition, ug Trade Union Congress of the Philippines. Nakiusa sab sa martsa ang Labor Consultative Assembly nga gimugna sa Caritas Philippines, Laban Manggagawa, ug uban pang grupo.

Tungod kay gilibutan og liboang pulis ang Malacañang, napugos ang mga mamumuo nga maghimo na lang og programa sa eskina sa Nicanor Reyes ug Recto Avenue. Human niini, gipangulohan sa KMU ang martsa padulong sa embahada sa US. Nanawagan sila alang sa daling paghunong sa gubat sa agresyon sa US-Israel sa Iran nga nagbunga og grabeng krisis sa Pilipinas ug sa tibuok kalibutan.

Sa gawas sa Metro Manila, adunay mga lihok-protesta nga gipangunahan sa KMU sa mga syudad sa Baguio, Angeles, Calamba, Legazpi, Tacloban, Cebu, Iloilo, Bacolod, ug Davao, ug sa mga sentrong lungsod sa Zambales, Bataan, Bulacan, Cavite, Aklan, Capiz, Iloilo City, ug Dinagat Islands. Sa gawas sa nasud, gipangunahan sa Migrante ang protesta sa mga migranteng mamumuong Pilipino sa pito ka syudad sa US, Canada, United Kingdom, France, the Netherlands, Germany, Italy, Hong Kong, South Korea, ug Japan.