Sa pamahayag niini niadtong Mayo 1, nanawagan ang Revolutionary Council of Trade Unions (RCTU), alyadong organisasyon sa National Democratic Front of the Philippines, sa hut-ong mamumuong Pilipino nga huptan ang makasaysayanong tahas nga pangulohan ang demokratikong rebolusyon sa katawhan aron ilingkawas ang nasud gikan sa imperyalismong US, pyudalismo, ug burukratang kapitalismo. Giduso sa grupo ang kamahinungdanon sa dinaghang pag-organisa sa mga mamumuo aron kini mapatuman.

Sumala sa RCTU, kinahanglang buntogon sa kalihukan sa mga mamumuo ang mga sakit sa pulitika sama sa ligalismo, ekonomismo, repormismo, NGOismo, ug sektoralismo aron mahinungdanong nga maka-amot sa pagpaasdang sa gubat sa katawhan. Panawagan niini nga tumanon ang mosunod nga mga tahas:

Organisahon ang pinakadaghang mamumuo ilabi na ang mga kontraktwal aron dinaghang itukod, palig-onon, ug palapdan ang mga tinuod, militante, ug anti-imperyalistang mga unyon. Ayaw paggapos sa mga ligal nga depinisyon sa balaod kon kinsa lang ang mahimong myembro sa unyon. Palihukon ang mga myembro sa unyon nga mag-organisa sa isigka-mamumuo sa ilang mga komunidad nga gipuy-an. Kinahanglang atubangon ang pag-organisa sa mga kabus sa dakbayan, kabatan-onan, ug kababayen-an sa mga komunidad. Paagi kini aron matuman ang tahas nga hiusahon ang mga mamumuo ug uban pang dinaugdaog nga sektor isip dugokan sa kalihukang masa sa kasyudaran.

Hingpit nga iasdang ang mga pakigbisog sa unyon ug ekonomiya sama sa umento sa suholan, pagbasura sa kontraktwalisasyon ug pleksibleng trabaho, ug uban pa. Kinahanglan sab nga pangulohan ug hugot nga makighiusa ang mga mamumuo sa mga nasudnong pakigbisog. Sa dagan sa pagpaasdang sa mga kampanya ug pakigbisog sa masa, kinahanglang himoon ang tanang porma sa propaganda ug pagtuon. Kinahanglang ipakaylap ang mga pagsusi sa RCTU sa mga adlaw-adlaw nga isyu ug ipresentar ang alternatibong programa sa demokratikong rebolusyong bayan.

Sa natad sa organisasyon, kinahanglang tukuron ang mga sanga sa Partido Komunista sa Pilipinas sa mga kumpanya aron padaghanon ug palig-onon ang mga rebolusyonaryong unyon. Dungan niini, kinahanglang tigumon ang mga abanteng mamumuo sa mga balangay sa Pulang Brigada sa mga mamumuo (PBM) sa matag departamento o linya sa trabaho sa mga empresa, sa mga shift, ug/o sa mga komite sa unyon. Ang sangay sa Partido, duyog ang mga balangay sa PBM, ang muporma sa rebolusyonaryong konseho sa sulod sa pabrika. Ang nagkadaghang rebolusyonaryong konseho ang muporma sa nasyonal nga pormasyon sa RCTU. Ang pagkusog sa RCTU magpasabot og nagkadakong suporta para sa armadong pakigbisog sa Bagong Hukbong Bayan (BHB) sa kabanikanhan.

RCTU sa Laguna. Niadtong Abril 29-30, nang-apod-apod sa mga sentrong syudad sa Laguna ang RCTU og mga polyeto nga adunay sulod sa ilang mga pamahayag. Gatusan ka polyeto ang gipanghatag sa tinguha nga awhagon ang mga mamumuo nga molihok ug mosalmot sa demokratikong rebolusyon sa katawhan.