Iti nadumaduma a paset ti pagilyan, agtigtignay dagiti mannalon, mangngalap ken katutubo para iti karbengan da iti daga, pagbiagan ken pagtaengan laban kadagiti lokal ken gangannaet a korporasyon ken iti sango ti panagbaybay-a ken pasismo ti rehimen Marcos.

Idiay Benguet, nagisayangkat ti prayer vigil dagiti porter, aglaklako ken residente iti La Trinidad Vegetable Trading Post idi Mayo 13 tapno kundenaren ti panagangkat ti Department of Agriculture ti carrots. Inyanunsyo ti departamento ti plano a panagangkat daytoy ti 6,000 metriko tonelada ti carrots para iti Abril, Mayo ken Hunyo tapno sungbatan ti kinakurang kano ti suplay ken maibaba ti presyo daytoy iti merkado.

Idiay Isabela, mano pulo a mannalon manipud iti nadumaduma a prubinsya ti nagtitipon iti asembliya ti Danggayan Dagiti Mannalon ti Isabela (Dagami) ken nagmartsa idiay Santiago City idi Mayo 11 tapno umawag ti pudno a reporma iti daga, suporta iti produksyon ken panangitandudo ti karbengan ti mannalon. Iti asembliya, binukel da ti maysa tawen a plano ti aksyon ken inyanunsyo da ti baro a nabotosan nga upisyal ken lider a mangpatibker iti organisasyon iti tengnga ti krisis iti kaaw-awayan.

Idiay Dagupan City, Pangasinan, nagtitipon dagiti babassit a mangngalap iti maysa a konsultasyon nga inyuna ti Pamalakaya idi Mayo 11, tapno supyaten ti komersyal a panagkalap iti uneg ti 15-kilometro a municipal waters. Pagam-amkan da ti panagadu ti dadakkel a bangka iti Lingayen Gulf kasaruno ti desisyon ti Korte Suprema idi Disyembre 2024 a mangipalpalubos iti dadakkel a kumpanya nga agkalap ditoy. Plano ti grupo a makidayalogo iti BFAR Region 1 tapno ipaganetget ti proteksyon iti pagbiagan da.

Idiay Nueva Vizcaya, nagitakder ti barikada idi Mayo 9 dagiti residente kadagiti barangay ti Pao, Paquet ken Kakidugen idiay Kasibu kas panagsupyat iti proyekto nga eksplorasyon ti North Luzon Mineral Resources Corporation. Intakder da dagiti barikada tapno harangen ti panagserrek dagiti alikamen ti kumpanya ken langis ken panangiruar ti mineral sample. Sakop ti eksplorasyon ti 4,456 ektarya ti daga a tawid ti Bugkalot/Ilongot para iti panagminas ti balitok ken tanso.

Idiay Quezon City, nagbarikada dagiti residente ken mannalon ti Pook Malantik, Barangay UP Campus idi Mayo 20 tapno lapdan ti panagserrek dagiti materyales para iti konstruksyon ti UP-DSHUD Housing Project a paset ti plano a proyekto a UP SDG Wellness Park. Iti konstruksyon ti Megawide Construction Corporation ket mapatalaw dagiti residente. Maysa a naisina a rali ti naiyaramid idi Mayo 12 ti kaabay a komunidad a Pook Aguinaldo laban iti proyekto.

Idiay Bukidnon, kinundenar dagiti katutubo a Manobo ti panagbakod ken panagkamkam ti Green Arrow Agriventures Inc-Kennemer Foods International iti tawid da a daga idiay Don Carlos. Balak ti kumpanya a palawaen ti plantasyon daytoy ti saba iti ag-agawen da a daga. Ar-aramaten da ti Support to Parcelization of Lands for Individual Titling (SPLIT) Project ti World Bank para iti panagkamkam iti tawid a daga.