Ha magkalain-lain nga dapit han nasud, nagios an mga parag-uma, parupangisda ngan minoriya para ha ira katungod ha tuna, panginabuhi ngan puruy-anan kontra ha mga lokal ngan langyaw nga korporasyon ngan ha atubangan han pagpasibaya ngan pasismo han rehimen Marcos.

Ha Benguet, naglansar han prayer vigil an mga porter, parupaninda ngan residente ha La Trinidad Vegetable Trading Post hadton Mayo 13 agud kundenahon an pag-import han Department of Agriculture han mga karot. Igin-anunsyo han departamento an plano nga pag-import hini han 6,000 metriko tonelada han karot para ha Abril, Mayo ngan Hunyo agud batunon kunuhay an kakulangan ha suplay ngan mapahimubo an presyo hini ha merkado.

Ha Isabela, pira kanapulo nga parag-uma tikang ha magkalain-lain nga bungto han prubinsya an nagtirok ha asembleya han Danggayan Dagiti Mannalon ti Isabela (Dagami) ngan nagmartsa ha Santiago City hadton Mayo 11 agud manawagan han tinuod nga reporma ha tuna, suporta ha produksyon, ngan pag-uundong han katungod han parag-uma. Ha asembleya, ginbug-os nira an usa katuig nga plano han aksyon ngan igin-anunsyo an bag-o nga gin-eleher nga upisyal ngan lider nga magpapadig-on ha organisasyon ha butnga han krisis ha kabaryuhan.

Ha Dagupan City, Pangasinan, nagtirok an gudti nga parupangisda ha usa nga konsultasyon nga ginpangunahan han Pamalakaya hadton Mayo 11, agud tipahan an komersyal nga pangingisda ha sakob han 15-kakilometro nga municipal waters. Iginkakabarak-an nira an pagdamo han dagko nga baloto ha Lingayen Gulf kasunod han desisyon han Korte Suprema hadton Disyembre 2024 nga nagtutugot ha dagko nga kompaniya nga mangisda dinhi. Plano nga makigdayalogo han grupo ha BFAR Region 1 agud ig-insister an proteksyon ha ira pakabuhian.

Ha Nueva Viscaya, nagtindog han barikada hadton Mayo 9 an mga residente han Pao, Paquet ngan Kakidugen ha Kasibu komo pagtipa ha proyekto nga eksplorasyon han North Luzon Mineral Resources Corporation. Igintindog an mga barikada agud ulangon an pagsulod han mga gamit han kompaniya ngan lana ngan paggawas han mineral sample. Lupgop han eksplorasyon an 4,456 kaektarya han ansestral nga tuna han Bugkalot/Ilongot para ha pagmimina han bulawan ngan tanso.

Ha Quezon City, nagbarikada an mga residente ngan parag-uma han Pook Malantik, Barangay UP Campus hadton Mayo 20 agud pugngan an pagsulod han mga materyales para ha konstruksyon han UP-DSHUD Housing Project nga kaparte han namamangpangan nga proyekto han UP SDG Wellness Park. Mapapalayas han konstruskyon han Megawide Construction Corporation an mga residente. Usa nga bulag nga rali an ginhimo hadton Mayo 12 han kasapit nga komunidad nga Pook Aguinaldo kontra ha proyekto.

Ha Bukidnon, ginkundenar han mga katutubo nga Manobo an pagkukudal ngan panlulupot han Green Arrow Agriventures Inc-Kennermer Foods International ha ira ansestral nga tuna ha Don Carlos. Plano han kompaniya nga pahiluagon an plantasyon hini han saging ha gin-aagaw nga tuna. Gin-gagamit an Support to Parcelization of Lands for Individual Titling (SPLIT) Project han World Bank para ha panlulupot ha ansestral nga tuna.