Sa lain-lain nga bahin sang pungsod, nagahulag ang mga mangunguma, mangingisda kag tumandok sa ila kinamatarung sa duta, palangabuhian kag puluy-an batuk sa mga lokal kag dumuluong nga korporasyon kag sa atubang sang pagpabaya kag pasismo sang rehimen Marcos.

Sa Benguet, naglunsar sang prayer vigil ang mga porter, manugtinda kag residente sa La Trinidad Vegetable Trading Post sadtong Mayo 13 agud kundenaron ang pag-import sang Department of Agriculture sang mga karot. Gin-anunsyo sang departamento ang plano nga pag-import sini sang 6,000 metriko tonelada sang karot para sa Abril, Mayo kag Hunyo agud sabton kuno ang kakulangan sa suplay kag mapanubo ang presyo sini sa merkado.

Sa Isabela, pila ka puluan ka mangunguma halin sa lain-lain nga banwa sang probinsya ang nagtipon sa asembliya sang Danggayan Dagiti Mannalon ti Isabela (Dagami) kag nagmartsa sa Santiago City sadtong Mayo 11 para manawagan sang matuod nga reporma sa duta, suporta sa produksyon, kag pagtib-ong sang kinamatarung sang mangunguma. Sa asembliya, ginhimo nila ang isa ka tuig nga plano sang aksyon kag gin-anunsyo ang bag-o nga napilian nga opisyal kag lider nga magapalig-on sa organisasyon sa tunga sang krisis sa kaumhan.

Sa Dagupan City, Pangasinan, nagtipon ang mga magagmay nga mangingisda sa isa ka konsultasyon nga ginpangunahan sang Pamalakaya sadtong Mayo 11, agud pamatukan ang komersyal nga pagpangisda sa sulod sang 15-kilometro nga municipal waters. Ginakahangaw-an nila ang pagdamo sang mga dalagko nga bangka sa Lingayen Gulf sunod sang desisyon sang Korte Suprema sadtong Disyembre 2024 nga pagpahanugot sa mga dalagko nga kumpaniya nga mangisda diri. Plano nga makig-dayalogo ang grupo sa BFAR Region 1 para igiit ang proteksyon sa ila palangabuhian.

Sa Nueva Vizcaya, nagtukod sang barikada sadtong Mayo 9 ang mga residente sang mga barangay sang Pao, Paquet kag Kakidugen sa Kasibu bilang pagpamatuk sa proyektong eksplorasyon sang North Luzon Mineral Resources Corporation. Gintukod ang mga barikada agud balabagan ang pagsulod sang mga gamit sang kumpaniya kag lana kag pagguwa sang mineral sample. Sakop sang eksplorasyon ang 4,456 ektarya nga dutang ginpanubli sang Bugkalot/Ilongot para sa pagmina sang bulawan kag saway.

Sa Quezon City, nagbarikada ang mga residente kag mangunguma sang Pook Malantik, Barangay UP Campus sadtong Mayo 20 agud punggan ang pagsulod sang mga materyales para sa konstruksyon sang UP-DSHUD Housing Project nga kabahin sang nagahana nga proyektong UP SDG Wellness Park. Mapalayas sang konstruksyon sang Megawide Construction Corporation ang mga residente. Isa ka separado nga rali ang ginpatigayon sadtong Mayo 12 sang katambi nga Pook Aguinaldo batuk sa proyekto.

Sa Bukidnon, ginkundenar sang mga tumandok nga Manubo ang pagkudal kag pagpang-agaw sang Green Arrow Agriventures Inc-Kennemer Foods International sa ila nga dutang ginpanubli sa Don Carlos. Plano sang kumpaniya ang palaparon ang plantasyon sini sang saging sa ginaagaw nga duta. Ginagamit ang Support to Parcelization of Lands for Individual Titling (SPLIT) Project sang World Bank para sa pagpang-agaw sa dutang ginpanubli.