Nasaknap a kinundenar ti nadumaduma nga organisasyon ti panangkunsintir ken panangsalaknib ti Senado ken Sen. Ronald “Bato” dela Rosa, kalpasan ti gandat a panangidatag kenkwana ti mandamyento de aresto nga insapubliko ti International Criminal Court (ICC), malem ti Mayo 11.

Naisaklang ni dela Rosa kas “indirect co-perpetrator” kadagiti krimen laban iti sangkataw-an ti pammapatay, nga addaan kainaigan iti “war on drugs.” Saklaw daytoy dagiti insidente ti pammapatay iti baet ti Hulyo 3, 2016 agingga Abril 2018, idi isuna ket hepe ti Philippine National Police.

Nagparang ni “Bato” idiay nga aldaw para iti maniobra nga ipatugaw ni Cayetano kas baro a presidente ti Senado. Innem a bulan a naglemmeng isuna iti buteng a maipaaresto ken maipan idiay The Netherlands.

Inkabil isuna ti Senado iti sidong ti protective custody tapno masigurado a saan a maaresto. Idi Mayo 13, nangparnuay ti drama dagiti kaalyado na a senador tapno makalibas ken agsubli iti panaglemmeng.

Idi Mayo 20, nagiruar ti Korte Suprema ti desisyon a nagkedked nga ipasardeng ti panangidatag ti ICC ti mandamyento de aresto kenkwana. Iti agdama, maibilbilang isuna a pugante.